Si do kishte reaguar ekonomia pa rritur normën bazë? – Studimi i BSH/ Leku në 2023 do ishte nënçmuar 11%, inflacioni 6.5 pikë më i lartë

Në mbyllje të vitit 2022 Banka e Shqipërisë ka bërë një vlerësim empirik të ecurisë së inflacionit, kursit të këmbimit dhe kredive me probleme në mungesë të ndërhyrjeve për frenimin e tij përmes rritjes së normës bazë të interesit. Për të vlerësuar ndikimin e kursit të normalizimit të politikës monetare gjatë vitit 2022, banka ka kryer disa simulime empirike me anë të Modelit të Parashikimit AfatmesëmII (MPM), i përdorur për të gjeneruar projeksionet makroekonomike dhe për të informuar vendimmarrjen e politikës monetare në Bankën e Shqipërisë.

Synimi i tyre është të ilustrojë sjelljen e variablave kryesorë makroekonomikë në rast të mungesës së reagimit të politikës monetare përmes ndërhyrjes në normën bazë të ineteresit. Ky simulim krahasohet më tej me skenarin bazë të parashikimit afatmesëm, i cili përmban dhe efektet e politikës monetare, për të bërë më evident ndikimin direkt të kësaj të fundit.

Sipas Bankës së Shqipërisë, vlerësimet konfirmojnë se reagimi në kohë i politikës monetare gjatë vitit 2022 ka ndikuar në zbutjen e pritjeve inflacioniste, ka dhënë një impuls mbiçmues të monedhës dhe ka frenuar rritjen e raportit të kredive me probleme. Kur të faktorizohen edhe kohëvonesat e përçimit të sinjalit të politikës monetare në tregun financiar, e më tej në ekonominë reale, kursi i normalizimit të politikës monetare do të ndihmojë në stabilizimin e ekonomisë dhe në kthimin e inflacionit në objektiv gjatë vitit 2024.

Rezultatet tregojnë se në mungesë të reagimit të politikës monetare: Së pari, Norma e inflacionit do të ishte rreth 0.4 p.p më e lartë në vitin 2022, dhe mesatarisht 6.5 p.p më e lartë gjatë viteve 2023 dhe 2024. Së dyti, Kursi i këmbimit të lekut kundrejt euros do të ishte 1.6% më i nënçmuar gjatë vitit 2022, dhe mesatarisht 11% më i nënçmuar për vitet 2023- 2024.

Së treti, Dobësimi i kursit të këmbimit do të sillte një rritje të kredive me probleme, të vlerësuar në masën 1.4 pikë përqindjeje për vitin 2022, dhe mesatarisht 5.6 pikë përqindjeje gjatë viteve 2023 dhe 2024.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.