Forcohet kontrolli për SHA-të publike – Pr.Ligji/ Drejtuesit angazhim të ulët, masa me bllokim të fondeve

Ministria e Financave ka hedhur për konsultim një projektligj të ri i cili synon të rrisë kontrollin financiar dhe të shmangë rastet e korrupsionit në njësitë publike. Drafti për disa ndryshime në ligjin “Për menaxhimin financiar dhe kontrollin” , e shtrin detyrimin për raportimin e gjendjes së sistemit të kontrollit të brendshëm edhe në shoqëritë tregtare të cilat zotërohen, kontrollohen, financohen ose garantohen financiarisht nga njësit e qeverisjes së përgjithshme duke mundësuar një monitorim më të zgjeruar të funksionalitetit të këtij sistemi.

Bëhet fjalë kryesisht për ato ente publike siç janë ndërmarrjet e ujësjellës kanalizimeve apo të shpërndarjes së energjisë elektrike të cilat funksionojnë në një farë forme pavarura financiarisht, edhe pse kërkojnë subvencion të vazhdueshme nga buxheti. Ndërkohë sipas dokumentit, bazuar në vlerësimet e vazhdueshme të sistemit të kontrollit të brendshëm, evidentohet se, problematikat vijnë kryesisht si pasojë e mosangazhimit të duhur të stafit si dhe nivelit të ulët të ndërgjegjësimit të menaxherëve në njësitë publike.

Gjithashtu, shpeshherë strukturat e njësive publike nuk janë të mjaftueshme për realizimin me sukses të aktiviteteve dhe implementimit të një sistemi efektiv të menaxhimit financiar dhe kontrollit. Në optikën e Ministrisë së Financave,  pavarësisht ofrimit të asistencës teknike në zbatimin e instrumenteve kryesorë të menaxhimit financiar dhe kontrollit, performanca e tyre në përmbushjen e kërkesave ligjore të fushës mbetet në nivele të ulta.

Me rishikimin e ligjit të menaxhimit financiar dhe kontrollit, propozohet gjithashtu ndërmarrja e disa masave disiplinore sanksionuese për forcimin e përgjegjshmërisë menaxheriale në funksion të zbatimit të kuadrit ligjor në fuqi me qëllim ndikimin edhe në përmirësimin e performancës së veprimtarisë së njësive publike. Masat lidhen me bllokimin e përkohshëm të përdorimit të fondeve buxhetore si dhe shkarkime nga detyra.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.