Franca heq kufijtë e tarifave të energjisë – Sipas qeverisë, vendimi do të reduktojë faturat për konsumatorët
Kristi Ceta/SCAN
Qeveria franceze mbështet heqjen e kufijve të taksave të energjisë elektrike për familjet, pasi po përpiqet të mbyllë një humbje masive në financat e vendit, tha ministri francez i buxhetit.
“Këta kufij u kanë kushtuar miliarda e miliarda euro taksapaguesve francezë”, tha Laurent Saint-Martin. “Me uljen e inflacionit nën 2% dhe çmimet e energjisë nën kontroll përsëri, a duhet të heqim kufijtë? Përgjigjja ime është po,” është shprehur ai.
Qeveria do të paraqesë një projekt-ligj buxhetor më vonë këtë javë që reflekton një përpjekje prej 60 miliardë eurosh për “shtrëngimin e rripit”, që të godasë objektivat e rinj fiskalë për të frenuar deficitin në rritje.
Rritja e taksave mund të arrijë në më shumë se 32.44 euro për megavat orë (Mwh), që janë nivelet e vendosura përpara krizës së inflacionit të vitit 2022, por Saint-Martin tha se kjo nuk do të çonte në fatura më të larta për konsumatorët për shkak të rënies së kostos bazë të energjisë elektrike.
“Rreth 80% e bashkëqytetarëve tanë janë me tarifë të rregulluar nga shteti, ndaj edhe pa kufirin e energjisë do të kenë një ulje të faturës rreth 10%”, tha ministri.
Kryeministri Michel Barnier ka premtuar të zvogëlojë deficitin buxhetor në 5% deri në fund të vitit 2025, edhe pse ai do të arrijë në 6.1% të Prodhimit të Brendshëm Bruto këtë vit. Pa një kthesë urgjente, shifra mund të rritet mbi 7% vitin e ardhshëm.
Megjithatë, kryeministri ka theksuar se do t’i duhet të shtyjë datën e synuar për arritjen e objektivit të përbashkët të deficitit prej 3% të eurozonës deri në vitin 2029, nga 2027 që ishte parashikimi.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.