Garanci sovrane 3 miliardë lekë për ushqimet! – Do të lëvrohet nga 4 banka, por Financa mund të ndërhyjë për rialokim

Importuesit e produkteve ushqimore në vend do të mund të përfitojnë nga instrumenti i ri i garancisë sovrane të sapomiratuar, në vlerën 3 miliardë lekë.

Kjo garanci sovrane synon të mbështesë subjektet që tregtojnë me shumicë produkte ushqimore bazë, që të mund të mbajë rezerva për një periudhë 3-mujore ose edhe më shumë, me qëllim përballimin e situatës së veçantë, të krijuar në treg.

Ky hap vjen si një masë mbështetëse për importuesit për krijimin e asaj që emërtohet si rezervë sigurie.

Që nga shpërthimi i pandemisë që nisi të vendosë nën presion zinxhirin global të furnizimit, qeveria shqiptare miratoi një akt normativ që detyronte depot farmaceutike dhe importuesit e ushqimeve që të krijon rezerva së paku 3 mujore.

Në kushtet aktuale, kur sfida është, jo presioni mbi zinxhirin e furnizimit por rritja e çmimeve të produkteve, bizneset shfaqin pamundësi për të ndërmarrë një iniciativë të tillë që praktikisht nënkupton një rritje të ndjeshme të sasisë së produkteve e si rrjedhojë edhe një rritje të ndjeshme të kostove për to.

Për të lehtësuar këtë operacion financiar, qeveria shqiptare ka ndjekur të njëjtën praktikë të ndjekur më parë, atë të garancisë sovrane, ku bizneset mund të marrin kredi në bankat tregtare duke pasur si garant qeverinë.

Vendimi i miratuar së fundi nga qeveria parashikon se ky instrument do të lëvrohet nga 4 bankat kryesore tregtare në vend por do të nevojitet së shpejti edhe një akt tjetër, ai i detajimit se si fondi 3 miliardë lekë do të ndahet mesa bankave.

Një element tjetër që parashikon vendimi është se Ministria e Financave mund të ndërhyjë nëse do të jetë e nevojshme për të rialokuar fondet nga njëra bankë në tjetrën. Ky vendim mund të merret në rastet kur njëri huadhënës, pra bankë, nuk e ka ezauruar ende shumën e garancisë dhe ajo do t’i kalohet një banke tjetër që mund ta ketë ezauruar atë.

Ndryshe nga vendimet e mëparshme, ky vendim orienton Ministrinë e Financave që të kërkojë këshillim apo asistencë nga Banka e Shqipërisë e madje, të rregullojë bashkëpunimin përmes një memorandum bashkëpunimi.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.