Gati financimet për parqet Arkeologjike – Pas Butrinitit dhe Durrësit, qytetet antike të Bylisit e Klosit do të menaxhohen me financim

Është hedhur për konsultime publike Plani I Menaxhimit të parkut arkeologjik të Bylisit dhe Klosit. Ky plan do të ketë një vizion i cili do të zhvillohet në dy faza kryesore, propozimi i ndërhyrjeve infrastrukturore dhe restauruese si dhe zbatimin e projekteve dhe organizmin e administrimit bashkëkohor të Parkut Arkeologjik të Bylisit.

“Aktivitetet dhe investimet në shtatë vitet e ardhshme janë të parapara nëpërmjet planit të veprimit, i cili përfshin aktivitetet specifike për realizimin e objektivave, rezultatet e matshme dhe institucionet përgjegjëse për zbatimin, duke specifikuar buxhetin dhe burimet e nevojshme për zbatim. Për këtë, metodologjia është bazuar kryesisht në zbatimin e projektit IPA 2018 “BE për Zhvillimin Ekonomik drejtuar nga turizmi, zhvillimi ekonomik dhe vendor me fokus mbi Trashëgiminë Kulturore”, thuhet në dokument

Ndërkohë në planin e menaxhimit theksohet se fondacioni i sapoformuar ka mundësi të përfitojë financime nga shumë burime të ligjshme, përfshirë organizata të ndryshme, institucione akademike, ente private, dhe të ngjashme, duke kontribuar në mbështetjen financiare për menaxhimin dhe funksionimin e sitit.

Një nga përgjegjësitë kryesore të Drejtorit të Përgjithshëm të këtij enti është të sigurojë financime nga një gamë e gjerë burimesh, të cilat mbulojnë si nevojat për investime kapitale afatgjata ashtu edhe të ardhurat për operacionet dhe aktivitetet e përditshme, për të menaxhuar rrezikun e investimeve në të ardhmen.

Fondacioni i ri do të ketë autoritet në të gjitha sferat e funksionimit që lidhen me mirëmbajtjen, mbrojtjen dhe promovimin e trashëgimisë kulturore, përfshirë menaxhimin e vizitorëve, organizimin e ngjarjeve, menaxhimin e shërbimeve turistike, zhvillimin e kapaciteteve të brendshme, dhe angazhimin me komunitetin lokal etj..

Dimila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.