Gazi rus, Putin mbyll rubinetin – Vendet anëtare të BE përgatiten për skenarin më të keq

Bashkimi Europian po përgatitet për një situatë në të cilën Rusia do të ndërpresë totalisht furnizimin me gaz për vendet anëtare. Presidentja e komisioni europian Von der Lejen u shpreh se plani do të prezantohet brenda gjysmës së muajit korrik

Për herë të parë u tha në një mënyrë shumë të qartë. Europa duhet të përgatitet ndaj mundësisë që Rusia të ndërpresë totalisht furnizimet me gaz pasi presidenti Vladimir Putin vazhdon të përdorë energjinë si një armë. Kjo është deklarata e presidentes së komisionit europian Ursula Von der Leyen, e cila propozon një skenar që deri  tani konsiderohej si një hipotezë ekstreme.

Ajo shtoi se komisioni europian po punon për një plan emergjence dhe do e prezantojë këtë plan dhe mjetet që duhen brenda gjysmës së muajit korrik. Vendet anëtare kanë planet respektive kombëtare të cilat tashmë janë aktivizuar. Por sipas Von Der Lejen duhet një koordinim europian dhe veprim i përbashkët.

Vendosja e kufirit të cmimit  të gazit është një nga masat e domosdoshme por në rast se do të ketë një ndërprerje totale të gazit rus duhen përshpejtuar të gjitha proceset për të anuluar varësinë nga Moska.

Në rast se Putin do të mbyllë rubinetin për Europën, nevojat kombëtare do të përmblidhen në një problem të përgjithshëm në nivel europian dhe gara për të grumbulluar sa më shumë rezerva dhe për të gjetur burime alternativa rrezikon të shndërrohet në një përplasje të vërtetë mes vetë shteteve anëtare. Kjo sepse dhe situatat janë të dryshme. Gjermania dhe Italia janë shumë më të varura nga Rusia, dhe pasoja e menjëhershme do të ishte një reduktim drastik i konsumit dhe racionimi i tij

Vond Der Lejen shtoi se në rast vështirësie, gazi duhet të shkojë në vendet që është më i domosdoshëm. Kjo për të mbrojtur tregun e përbashkët dhe zinxhirët e industrisë. Në një frazë të vetme janë të gjitha prioritetet që do të dilnin në pah në rast se gazi rus nuk do të furnizonte më Europën, dhe zgjidhja është solidariteti europian.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.