Gazprom redukton furnizimin për Italinë – Vendi tashmë përfiton 15% më pak gaz rus

Gazprom uli eksportet e gazit në Itali me rreth 15% të mërkurën, ndërsa lajmi u konfirmua nga kompania italiane e energjisë Eni, duke shtuar se nuk ishte dhënë asnjë shpjegim për reduktimin.

Vendimi vjen në një moment që Gazprom po redukton furnizimet me gaz dhe nëpërmjet tubacionit nënujor Nord Stream 1 për në Gjermani, duke fajësuar sanksionet perëndimore për ndërprerjen e punimeve të riparimit që duhet të bëjë në rrjet. Aktualisht volumi maksimal ditor i gazit të importuar është 67 milion metra kub. Reduktimi më i fundit e con në nivelin e 60% më pak gaz brenda dy ditësh.

Një vit më parë, Italia siguroi 40% të importeve të saj të gazit nga Rusia, ose rreth 29 miliardë metra kub. Njësoj si partnerët e saj europianë, Roma ka qenë nën presion të madh për të reduktuar varësinë e saj nga energjia ruse që kur Moska pushtoi Ukrainën në muajin shkurt. Procesi, megjithatë, kërkon kohë dhe qeveria ka qenë gjithashtu e zënë në frontin diplomatik në përpjekje për të gjetur një rrugëdalje nga konflikti që përfshiu Ukrainën.

Ministri italian i Tranzicionit Ekologjik, Roberto Cingolani u përpoq të qetësonte shqetësimet e shkaktuara nga masa e Gazprom, duke thënë se reduktimi i gazit nuk kishte krijuar ndonjë situatë kritike. Shefi ekzekutiv i Italgas, shpërndarësi më i madh i gazit në vend, bëri apel për qetësi.

Të mërkurën, Izraeli dhe Egjipti nënshkruan një marrëveshje me Bashkimin Europian, duke u zotuar të rrisin eksportet e gazit për bllokun.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.