Gjermania paralajmëron Bashkimin Europian – Shkak, ndërhyrja me skema për bankat në vështirësi

Gjermania paralajmëroi Bashkimin Europian të mos ngatërrojë rregullat që lejojnë bankat që janë pjesë e një rrjeti që ofron ndihmë financiare në një moment krize, që të përfitojnë nga kërkesat më të ulëta për kapital dhe likuiditet. Komisioni Europian ekzekutiv i BE-së do të përcaktojë më 18 prill draft reformat për rregullat rreth trajtimit të bankave të goditura.

Ky reagim vjen në një moment kritik të sektorit pas bashkimit të UBS me Credit Suisse, dhe dështimit të disa bankave amerikane, duke përfshirë Silicon Valley Bank. Ministri gjerman i Financave, Christian Lindner, në një letër drejtuar Komisionit Europian dhe Eurogrupit, theksoi se ekzekutivi i BE-së duhet të respektojë “marrëveshjen e qartë” të bërë në qershor të vitit të kaluar për të ruajtur kuadrin për të ashtuquajturat ‘Skema të Mbrojtjes Institucionale’.

Një zyrtar i BE tha se Eurogrupi i kërkoi komisionit të forcojë dhe harmonizojë rregullat për përdorimin e fondeve të skemave kombëtare të garancisë së depozitave kur një bankë ndodhet në një situatë problematike.

Ai shtoi se komisioni ka konsultuar gjerësisht shtetet anëtare dhe palët e interesuara përpara se të finalizojë propozimin. Sipas tij ai do të jetë një propozim i balancuar, duke marrë parasysh specifikat e modeleve kombëtare bankare dhe një reformë e dobishme në rrugën drejt kompletimit të Unionit Bankar.

Skemat lidhin bankat në një rrjet kombëtar, duke lejuar një huadhënës në vështirësi të marrë ndihmë financiare nga anëtarët e tjerë të skemës, duke formuar një pjesë të mbrojtjes së një vendi për depozituesit e bankave.

Bankat pjesëmarrëse paguajnë në rrjet dhe përfitojnë nga reduktimet në disa kërkesa për kapital dhe likuiditet. Skema të tilla janë krijuar në Gjermani, Austri, Itali, Spanjë dhe Poloni. Lindner tha se planet aktuale të komisionit do të prezantojnë “një numër kufizimesh të reja dhe domethënëse” në skemat e IPS duke i trajtuar ato si skema të garancisë së depozitave. Elementë të tjerë në projekt-plane, si fusha shumë e gjerë e rregullave, do të çonin në “negociata shumë të vështira”, sipas Lindner.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.