Google investon 25 milionë euro për IA në Europë – Kurse falas në 18 gjuhë të ndryshme për të mësuar përdorimin e saj

Google ka deklaruar se do të investojë 25 milionë euro për të ndihmuar njerëzit në Europë të mësojnë përdorimin e inteligjencës artificiale. Duke shpallur financimin, gjigandi i teknologjisë tha se kishte hapur aplikime për sipërmarrjet sociale dhe jofitimprurëse që mund të ndihmojnë në arritjen e atyre që kanë më shumë gjasa të përfitojnë nga trajnimi.

Kompania do të drejtojë gjithashtu një seri “akademi të rritjes” për të mbështetur kompanitë që përdorin IA dhe ka zgjeruar kurset e saj falas të trajnimit në 18 gjuhë. Sipas ekspertëve, kërkimet tregojnë se përfitimet e IA mund të përkeqësojnë pabarazitë ekzistuese, veçanërisht në aspektin e sigurisë ekonomike dhe punësimit. Në këtë mënyrë ky program i ri do t’i ndihmojë njerëzit në të gjithë Europën të zhvillojnë njohuritë, aftësitë dhe besimin e tyre rreth IA, duke siguruar që askush të mos mbetet prapa.

Muajin e kaluar, Google njoftoi se do të investonte 1 miliard dollarë në ndërtimin e një qendre të dhënash jashtë Londrës, ndërsa po lëviz për të përmbushur kërkesën në rritje për shërbimet e internetit në rajon. Qendra e të dhënave, e vendosur në një zonë prej 13 hektarësh të blerë nga Google në 2020-ën, do të vendoset në qytetin Waltham Cross, rreth 24 km në veri të Londrës Qendrore.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.