Greva që kushtoi gati 10 miliardë dollarë – Si arritën punëtorët e Fordit të merrnin rritje rekord page?
Ford dhe sindikata “United Auto Workers” kanë arritur një marrëveshje paraprake që përfshin rritje rekord të pagave ndërsa përpiqen t’i japin fund një greve që ka vazhduar për gati gjashtë javë. Marrëveshja do të jetë kompromisi i parë në kuadrin e grevës së cilës i janë bashkuar punëtorët e Fordit, General Motors dhe Stellantis.
Nëse kontrata e re merr miratimin e punëtorëve të Fordit, ajo do të jetë baza e negociatave me GM dhe Stellantis.
Siç njoftoi presidenti i UAW, Sean Fein, marrëveshja përfshin një rritje prej 25% të pagave gjatë kohëzgjatjes së kontratës, e cila është 4.5 vjet. Fillimisht pagat do të rriten me 11%. Punëtorët e përkohshëm me pagesë më të ulët do të shohin rritje prej më shumë se 150% gjatë kësaj kohe. Sindikata fitoi gjithashtu të drejtën për grevë për ‘bllokimet’ e ardhshme në uzinat e Ford.
Presidenti i Shteteve të Bashkuara të Amerikës Joe Biden përshëndeti marrëveshjen paraprake. Ai u shpreh se ajo ofron një rritje rekord për punëtorët e industrisë së automjeteve, të cilët kanë sakrifikuar aq shumë për të siguruar që kompanitë legjendare të Big 3 mund të udhëheqin ende në cilësi dhe inovacion. Greva, e cila filloi më 15 shtator, është e para në historinë 88-vjeçare të UAW që synon të tre prodhuesit kryesorë të automjeteve në të njëjtën kohë.
Sindikata u fut në negociata duke kërkuar pothuajse 40% rritje pagash gjatë katër viteve. Ndër kërkesat e tjera ishte fundi i praktikës së industrisë për marrjen e pagave më të ulëta dhe më pak përfitime për të punësuarit e rinj.
UAW ishte në gjendje të ushtronte presion intensiv mbi gjigantët e industrisë duke goditur punëtorët në fabrikat më fitimprurëse të industrisë. Humbja totale ekonomike nga greva ka arritur në 9.3 miliardë dollarë, sipas të dhënave të publikuara nga Anderson Economic Group.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.