Grupi Balfin, Memorandum Bashkëpunimi me Fakultetin e Shkencave të Natyrës. Dekani Drushku: Hap i rëndësishëm për integrimin e studentëve në rrugët e biznesit

Krijimi i urave të reja me institucionet e arsimit të lartë janë synimet e grupit Balfin të cilat po realizohen. Është nënshkruar Memorandumi i Bashkëpunimit i Grupit Balfin me Fakultetin e Shkencave të Natyrës për përgatitjen dhe integrimin e sa më shumë studentëve në tregun e punës.

Dekani i shkencave të natyrës Prof. Dr. Spiro Drushku e vlerësoi iniciativën e grupit për të qenë pranë universiteteve, vlerat e mira të bizneseve të Balfin që mund t’i sjellë arsimit, duke pohuar interesin e studentëve për t’u përfshirë në aktivitetet e kompanive të tij.

“Fakulteti i Shkencave të Natyrës në Universitetin e Tiranës është pjesë e katër programeve me prioritet kombëtar. Marrëdhënia e tij e frytshme me kompanitë tregtare e bën më të denjë pozicionimin e institucionit dhe të studentëve përballë partnerëve kombëtarë dhe ndërkombëtarë, si dhe ndihmon zhvillimin e qëndrueshëm” tha Spiro Drushku, Dekan i Fakultetit të Shkencave të Natyrës

Memorandumi i Bashkëpunimit krijon hapësirën e nevojshme që kompanitë e Grupit Balfin të mbështesin Fakultetin e Shkencave të Natyrës për një proces akademik më cilësor për studentët dhe pedagogët. Në këtë zyrtarizim të këtij hapi të ri, Drejtore Ekzekutive e Grupit Balfin, Edlira Muka përmendi disa prej kontributeve që Balfin ka bërë në fushën e arsimit.

“Gjatë këtij viti, Grupi BALFIN ka pajisur katër laboratorë të fakultetit me mjete të teknologjisë së informacionit dhe komunikimit, nëpërmjet programit të tij B4Students, i cili i dedikohet posaçërisht arsimit.  Drejtorët e kompanive tona ndajnë ekspertizën praktike në klasat universitare, duke u fokusuar në fushat me ndikimin më të madh në të ardhmen e shoqërisë. Do të vazhdojmë shkëmbimin e praktikave më të mira, për të arritur promovimin e kërkimit të mirëfilltë shkencor dhe madje edhe të konsulencës për kurrikulat akademike” tha Muka.

Grupi BALFIN vijon të krijojë mundësi për studentët që të integrohen në strukturat e bizneseve në këto kompani. Mbështetja e arsimit është një nga drejtimet e përgjegjësisë sociale të Grupit BALFIN, duke pasur vëmendjen e veçantë të Presidentit të tij, Samir Mane.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.