Hapet gara për centrale energjie me masa mbështetëse – Lidhja në rrjet, e garantuar. Blerje nga shteti për 15 vjet

Ministria e Infrastrukturës dhe Energjisë ka hapur procedurën konkurruese për përzgjedhjen e projekteve, për projektimin, financimin, ndërtimin, operimin dhe mirëmbajtjen e disa impianteve fotovoltaike, të cilët do të përfitojnë masa mbështetëse, sipas legjislacionit në fuqi. Secili prej projekteve mund të ketë një kapacitet të instaluar ndërmjet 10 MW dhe 100 MW, ndërkohë që vendndodhja duhet të zgjidhet nga ofertuesi.

Tarifa e regjistrimit për pjesëmarrje në procedurën konkurruese është 1,000 Euro dhe duhet të kryhet të paktën 5 ditë pune përpara afatit të dorëzimit, në një nga llogaritë bankare të treguara nga Autoriteti Kontraktues.

Ndërkohë që, sipas njoftimit të ministrisë afati i fundit për dorëzimin e dokumentacionit për aplikim është data 10 qershor 2024. Referuar vendimit të qeverisë për nxitjen e përdorimit të energjisë së prodhuar nga burime të rinovueshme janë një sërë masash mbështetëse që parashikohen në rast se projekti finalizohet.

Më konkretisht, garantohet kontrata për blerjen e energjisë elektrike të prodhuar, me një kohëzgjatje maksimale prej 15 vjet, duke filluar nga data e dhënies së certifikatës së përdorimit të projektit.

Gjithashtu, këta prodhues do të kenë të garantuar lidhjen dhe aksesin për përdorimin e rrjetit të transmetimit/shpërndarjes së energjisë së prodhuar. Ndërkohë që, një lehtësi tjetër ka të bëjë me procedurat e marrjes së të gjitha lejeve dhe autorizimeve të nevojshme për zbatimin dhe shfrytëzimin e projektit, që sipas vendimit do të ndiqen nga autoriteti kontraktor, që në këtë rast është Ministria e Infrastrukturës dhe Energjisë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.