Harta e naftës falas në bujqësi – Fieri “më punëtori”, cilat janë qarqet që përfituan më shumë dhe më pak

19.412 fermerë në të gjithë vendin janë përfitues të naftës falas për punime të mekanizuara në bujqësi. Agjencitë Rajonale të Ekstensionit Bujqësor po vijojnë shpërndarjen e kartave të naftës për përfituesit. Përmes kartave të cilat do t’iu mundësojnë fermerëve ulje të kostove, shpërndahen mesatarisht 70-100 litra naftë falas për çdo hektar tokë të mbjellë, në varësi të kulturave bujqësore.

Por cili qark ka përfituar më shumë nga kjo masë e ministrisë së bujqësisë? SCAN TV ka analizuar numrin e përfituesve në bazë qarku, ku rezulton se Fieri mban kampion me 6709 fermerë të përzgjedhur dhe në fakt kjo nuk është surprizë pasi në këtë rajon është përqendruar më së shumti zhvillimi i bujqësisë. Në vendin e dytë renditet qarku Korçë me 3819 përfitues, ndjekur nga Qarku Elbasan me 2181 fermerë përfitues dhe më tej qarku Berat me 1649.

Ndërsa më pak fermerë kanë përmbushur kriteret e përfitimit  në qarqet Lezhë dhe Kukës, përkatësisht 312 dhe 74.  Sipas Agjencisë së Zhvillimit Bujqësor dhe Rural, nga verifikimet në terren deri tani, fermerët që kanë përfituar nga skema e naftës, kultivojnë një sipërfaqe pre 72 mijë hektarësh me kultura të ndryshme bujqësore. Sipas AZHBR-së, interesi i fermerëve për të përfituar nga Skema Kombëtare është tejet e lartë dhe sasia e naftës së përcaktuar mund të tërhiqet deri në datën 31 dhjetor 2023. Numri i aplikimeve këtë vit, ka qenë dyfish  më shumë krahasuar me një vit më parë.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.