Hoteli me temperatura nga -5 në -8 gradë – Klientët flenë në shtrate prej akulli

Në Suedi ndodhet hoteli i parë prej akulli në botë. Me dhomat në një temperaturë deri në minus 8 gradë, vendi tërheq në këtë periudhë turistë nga e gjithë bota. Hoteli ofron edhe një kinema dhe një sallë për ceremoni të ndryshme, të dyja të ndërtuara tërësisht nga akulli

Shumë turistë udhëtojnë në veri të Europës në dhjetor për të përjetuar udhëtime emocionuese me sajë, për të admiruar dritat polare dhe për të takuar Santa Claus në ‘mjedisin e tij natyror’.

Megjithatë, ndoshta përvoja më e pazakontë që mund të përjetohet është një natë në dhomat e akullit! “Icehotel” në Jukkasjärvi të Suedisë është pikërisht ai – një hotel i ndërtuar nga akulli dhe bora. Javën e kaluar u hap për publikun për herë të 34-të dhe në ‘të është e mundur të flihet.

Me peizazhin e tij të bukur Jukkasjärvi ka qenë gjithmonë një destinacion i preferuar veror në Suedi. Sidoqoftë, në vitin 1989, një vendas vendosi të përmirësojë përvojën e vendit të tij dhe të krijojë një atraksion të ri dimëror – hoteli i parë i akullit në botë. Ai e gjeti frymëzimin për këtë ide të pazakontë një mbrëmje kur një grup aventurierësh, të pajisur me lëkurë dreri dhe çanta gjumi, e pyetën nëse mund ta kalonin natën brenda punishtes së tij prej akulli. Ai e kuptoi shpejt se hapja e një hoteli në akull do të ishte një ide vërtet e jashtëzakonshme.

Hoteli i akullit në Suedi tërheq vizitorë nga e gjithë bota, dhe dhomat mbahen në temperatura midis -5 dhe -8 gradë. I bërë nga akulli i lumit Torna, hoteli i akullit kalon çdo vit një lloj “rimishërimi” dhe shndërrohet në forma krejtësisht të reja që të lënë pa frymë. Në këtë vend të jashtëzakonshëm, disa dhjetëra artistë nga vende të ndryshme mblidhen për të sjellë në jetë modelet e tyre inovative.

Temperaturat e dhomës së hotelit mbahen midis -5 dhe -8°C për të siguruar që akulli të mbetet i paprekur gjatë gjithë sezonit të dimrit. Pavarësisht të ftohtit, të gjithë të ftuarit flenë në shtretër akulli, por për t’i mbajtur ata ngrohtë, ofrohen dyshekë të trashë, çanta gjumi termal dhe batanije të ngrohta prej lëkure dreri. Çdo mëngjes në hollin e hotelit ata priten me një filxhan çaj të nxehtë, më pas një vizitë falas në sauna për t’u ngrohur.

Sipas informacioneve nga faqja zyrtare, hoteli ofron edhe një kinema dhe një sallë për ceremoni të ndryshme, të dyja të ndërtuara tërësisht nga akulli. Udhëtimi në ‘Icehotel’ është i lehtë: ka trena dhe aeroplanë të rregullt nga Stokholmi në Kiruna, dhe nga Kiruna në Jukkasjärvi është një udhëtim i shkurtër me autobus prej 30 deri në 50 minuta, në varësi të motit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.