India ndalon eksportin e sheqerit – Vendimi, për herë të parë në shtatë vjet
India pritet të ndalojë eksportin e sheqerit sezonin e ardhshëm duke filluar nga muaji tetor, një vendim që merret për herë të parë në shtatë vjet, pasi mungesa e shiut ka ulur rendimentin.
Mungesa e Indisë në tregun botëror ka të ngjarë të rrisë çmimet standarde në Nju Jork dhe Londër, të cilat tashmë po tregtohen rreth niveleve të larta shumëvjeçare, duke shkaktuar frikën e inflacionit të mëtejshëm në tregjet globale të ushqimit.
Burime qeveritare u shprehën se fokusi kryesor i ekzekutivit indian është përmbushja e kërkesave vendore për sheqer dhe të prodhohet etanol nga kallam sheqeri i tepërt. Sipas shifrave zyrtare për sezonin e ardhshëm, nuk do të ketë sheqer të mjaftueshëm për të ndarë për kuotat e eksportit.
India lejoi eksportin e vetëm 6.1 milion ton sheqer gjatë sezonit aktual deri në 30 shtator, pasi la të shitej një rekord prej 11.1 milion ton sezonin e kaluar. Në vitin 2016, India vendosi një taksë 20% mbi eksportet e sheqerit për të frenuar shitjet jashtë vendit.
Reshjet e shiut në zonat më të larta të rritjes së kallamishteve të shtetit perëndimor të Maharashtra dhe shtetit jugor të Karnataka – të cilat së bashku përbëjnë më shumë se gjysmën e prodhimit të përgjithshëm të sheqerit në Indi – kanë qenë deri në 50% nën mesataren deri më tani këtë vit.
Çmimet lokale të sheqerit u rritën këtë javë në nivelin e tyre më të lartë në gati dy vjet, duke bërë që qeveria të lejojë shitjen e 200 mijë ton sheqer shtesë në gusht.
Sipas burimeve qeveritare inflacioni i ushqimeve mbetet një shqetësim, dhe rritja e fundit e çmimeve të sheqerit eliminon çdo mundësi eksporti.
Inflacioni i shitjes me pakicë në Indi u rrit në nivelin më të lartë 15-mujor prej 7.44% në korrik dhe inflacioni i ushqimeve në 11.5% – më i larti në më shumë se tre vjet. Prodhimi i sheqerit në Indi mund të bjerë 3.3% në 31.7 milion ton në sezonin 2023/24.
India i befasoi blerësit muajin e kaluar duke vendosur një ndalim për eksportet e orizit të bardhë. Nju Delhi vendosi gjithashtu një taksë 40% javën e kaluar për eksportet e qepëve, ndërsa përpiqet të qetësojë çmimet e ushqimeve përpara zgjedhjeve këtë vit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.