Teknologjia i shpall “luftë” BE-së: Kompanitë e mëdha, kundër rregullave të ashpra!

Kompanitë më të mëdha dixhitale në botë janë gati të përballen me rregullat më të rrepta të Bashkimit Europian  për përmbajtjen në internet pasi Ligji i Shërbimeve Dixhitale – DSA, pritet të hyjë në fuqi. Këto rregullore të reja synojnë të caktojnë përgjegjësitë e kompanive teknologjike si dhe të vendosin rend në botën online, e cila shpesh është përshkruar si një “perëndim i egër”. DSA do t’u kërkojë kompanive të kontrollojnë në mënyrë aktive përmbajtjen dixhitale, të luftojnë dezinformimin dhe gjuhën e urrejtjes, ose në të kundërt do të përballen me gjoba të konsiderueshme.

Duke filluar nga e premtja, e gjithë vëmendja do të jetë tek mënyra se si platformat përputhen me DSA dhe si do të ndryshojë jeta online në Europë. Ekspertët parashikojnë se këto rregullore mund të kenë një efekt zinxhir përtej BE-së. Suzanne Vergnolle, një profesoreshë e së drejtës teknologjike në Konservatorin Kombëtar të Arteve dhe Artizanatit në Paris, beson se DSA është pjesë e një strategjie më të gjerë për të fuqizuar individët, rregullatorët dhe shoqërinë civile. Ai përfaqëson një hap tjetër drejt përgjegjshmërisë më të madhe në fushën dixhitale.

Sipas DSA, faqet me të paktën 45 milionë përdorues aktivë mujorë duhet t’u përmbahen rregullave më të rrepta. Kjo përfshin kryerjen e auditimeve vjetore të pajtueshmërisë dhe luftën efektive kundër dezinformimit. Në prill, 19 website u etiketuan nga BE-ja, duke përfshirë Amazon Store, AppStore të Apple dhe Google Play, Maps dhe Shopping. Gjigantët e mediave sociale si Instagram, LinkedIn, Pinterest, Snapchat, TikTok, YouTube, Twitter, motorët e kërkimit të Microsoft Google dhe Bing u përfshinë gjithashtu në listën e platformave që do të duhen të përshtaten me rregullat e reja.

Edhe përpara se rregullat të hyjnë në fuqi, Amazon dhe Zalando janë deklaruar të përgatitura për sfida ligjore duke argumentuar se platformat e tyre nuk plotësojnë kriteret për mospërputhje me valën fillestare të rregulloreve. Megjithatë, përdoruesit individualë nuk ka gjasa të ndiejnë menjëherë efektet e këtyre ndryshimeve javën e ardhshme kur ato të hyjnë në fuqi.

Shumë platforma tashmë po përmbushin në mënyrë proaktive detyrimet e tyre të pajtueshmërisë përpara kohe. Komisioneri i industrisë Thierry Breton theksoi se kompanitë kanë pasur kohë të mjaftueshme për të përshtatur sistemet e tyre për këto detyrime të reja. Ai dhe ekipi i tij janë të përgatitur të zbatojnë me rigorozitet DSA-në dhe të hetojnë dhe sanksionojnë platformat sipas nevojës.

Disa kompani kanë njoftuar tashmë hapat për të respektuar rregullat. Meta dhe TikTok, pronarë të Facebook dhe Instagram, zbuluan në gusht se do t’u ofrojnë përdoruesve europianë më shumë kontroll mbi shikimin e përmbajtjes, duke përfshirë opsionin për të hequr dorë nga rekomandimet e bazuara në profil. BE-ja do të vëzhgojë nga afër X – ish Twitter, që kur Elon Musk mori përsipër platformën vitin e kaluar, pasi ka pasur shqetësime në lidhje me pajtueshmërinë me kërkesat e moderimit të përmbajtjes.

Google pretendon se ka zbatuar tashmë politika që synojnë transparencë dhe llogaridhënie më të madhe përpara se DSA të hyjë në fuqi. Pavarësisht sfidave ligjore nga kompani si Amazon dhe Zalando, Komisioni Europian këmbëngul që të gjitha platformat duhet të respektojnë rregulloren e re. Shkeljet e këtyre rregullave mund të rezultojnë në gjoba deri në 6% të të ardhurave globale të një kompanie ose edhe bllokim të plotë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.