Investitorët braktisin energjinë e rinovueshme – Shkak, normat e larta të interesit dhe kosto e lëndëve të para
Sektori i energjisë së rinovueshme duket se ka humbur prestigjin e tij me investitorët gjatë verës. Tremujori korrik-shtator regjistroi një numër rekord investimesh nga fondet që operojnë në sektorin përkatës, pasi kompanitë u përballën me norma të larta kreditimi dhe rritje të kostove të lëndëve të para.
Pavarësisht premtimeve në Europë dhe Shtetet e Bashkuara të Amerikës për të mbështetur tranzicionin e gjelbër me miliarda dollarë të shpenzuara për subvencione dhe ulje taksash, besimi i investitorëve në energjinë e pastër u lëkund dhe daljet në tremujor arritën në 1.4 miliardë dollarë. Kjo është dalja më e madhe tremujore e regjistruar ndonjëherë. Natyrisht, në gjysmën e parë investimet kishin arritur në 3.36 miliardë dollarë, që do të thotë se në nëntë muaj shenja është ende pozitive.
Megjithatë, një sinjal rreziku jep edhe tkurrja e aktiveve të menaxhuara nga kompanitë përkatëse, pasi vlera e tyre është ulur me 23% që nga fundi i korrikut, në 65.4 miliardë dollarë.
Në përgjithësi, besimi i investitorëve po rrëshqet, me indeksin e energjisë së pastër të S&P Global, i cili ndjek performancën e 100 kompanive kryesore në industri, me rreth 28.5% rënie që nga fillimi i vitit. Vlen të përmendet, në të kundërt, se indeksi i energjisë S&P 500, i cili përbëhet kryesisht nga kompani të karburanteve fosile, është rritur lehtë, me rreth 1.12%, në 2023 – shin.
Kompanitë e sektorit të energjisë së rinovueshme, madje edhe ato me perspektiva të larta rritjeje, janë bërë “viktima” e pasigurisë aktuale ekonomike për shkak të normave të larta të huamarrjes, rritjes së kostove të lëndëve të para dhe problemeve individuale të zinxhirit të furnizimit, siç është dominimi i Kinës në energjinë diellore.
Këto kompani shpesh lidhin kontrata afatgjata me çmime fikse. Tashmë, kostot e huamarrjes janë rritur dhe lëndët e para janë mbiçmuar për shkak të inflacionit, duke shtrydhur rentabilitetin e tyre. Rëndim i mëtejshëm i industrisë janë vonesat në dhënien e lejeve dhe ndërtimit, duke dekurajuar më tej investitorët.
Disa plane për turbinat e erës në det të hapur në Britani, Holandë dhe Norvegji janë pezulluar apo edhe tërhequr për shkak të rritjes së kostove dhe problemeve në zinxhirin e furnizimit. Megjithatë, disa ekspertë parashikojnë se programi i SHBA për të nxitur investimet në tranzicionin e gjelbër me subvencione të mëdha qeveritare mund të ringrejë tregun.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.