Italia mbetet pa ujë të gazuar – Mungon dioksidi i karbonit, prodhuesit shprehen të dëshpëruar
Mungesa e dioksidit të karbonit ka futur në krizë sektorin e ujit të gazuar në Itali. Prodhuesit shprehen të dëshpëruar duke paralajmëruar se për pak ditë nuk do të ketë më asnjë shishe ujë të gazuar për shitje. Italia është vendi i parë europian dhe nga të parët në botë për sa i përket konsumit të ujit në shishe me një mesatare prej më shumë se 200 litra në vit për person.
Kriza energjitike ka goditur rëndë dhe sektorin e ujit të gazuar në Itali. Problemi kryesor është mungesa e dioksidit të karbonit. Pjesa më e madhe e ujit të gazuar që gjendet në Itali në fakt vjen nga uji natyral të cilit i shtohet dioksid karboni. Prodhuesit janë në pritje të disa kamionëve që do të vijnë nga jashtë por do të mjaftojë vetëm për pak ditë për të mos thënë për pak orë. Në momentin që do të përfundojnë rezervat me dioksid karboni prodhimi do të ndalojë dhe në magazina e supermarkete nuk do të ketë më ujë të gazuar në shitje.
Kompania Sant’Anna, lider europian në sektor, prodhon 1.5 miliard shishe cdo vit. Por tashmë kompania ka ndaluar prodhimin e produkteve të gazuara duke thënë se dioksidi i karbonit nu gjendet më dhe se kompanitë e tjera janë në të njëjtën situatë. Ekspertët sqarojnë se është një problem shumë i rëndë që i shtohet dhe shtrenjtimit të lëndëve të para dhe thatësirës që po varfëron burimet. Kompanitë e dioksidit të karbonit zgjedhin të cojnë prodhimin në sektorin e shëndetësisë pavarësisht se furnizuesve iu jepen cmime gjithnjë e më të larta.
Italia është vendi i parë europian dhe nga të parët në botë për sa i përket konsumit të ujit në shishe me një mesatare prej më shumë se 200 litra në vit për person. Kriza në sektor mund të shkaktojë një rritje të mëtejshme cmimesh duke pasur parasysh kërkesën e lartë për ujë të gazuar. Mungesa e dioksidit të karbonit mund të shkaktojë krizë dhe për të gjithë sektorin ushqumor. Industria e ëmbëlsirave në fakt e përdor për të përgatitur një pjesë të madhe të produkteve që konsumohen nga italianët.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.