Italia ul parashikimin e rritjes ekonomike për vitin 2023 ndërsa financat publike përmirësohen!

Qeveria në largim e kryeministrit italian Mario Draghi të mërkurën uli parashikimin e rritjes ekonomike për vitin e ardhshëm në 0.6% për shkak të rritjes së kostove të energjisë. Megjithatë, ajo tha se të ardhurat do të siguronin një përmirësim të financave publike.

Produkti i brendshëm bruto në ekonominë e tretë më të madhe të eurozonës do të “ulet lehtë” gjatë gjysmës së dytë të këtij viti, thuhet në një deklaratë të qeverisë.

Parashikimet e reja të rritjes nxjerrin në pah sfidat ekonomike me të cilat përballet Giorgia Meloni, e cila udhëhoqi një bllok të krahut të djathtë drejt fitores në zgjedhjet të dielën dhe pritet të emërohet si kryeministre muajin e ardhshëm.

Dokumenti vjetor ekonomik dhe financiar i Thesarit (DEF) tha se PBB-ja do të zgjerohej me 3.3% në 2022, nga një parashikim prej 3.1% i vendosur në prill, falë rritjes së gjallë gjatë gjashtë muajve të parë.

Parashikimi prej 0.6% për vitin e ardhshëm sinjalizon një përkeqësim të konsiderueshëm të perspektivës krahasuar me objektivin e mëparshëm prej 2.4%.

Draghi tashmë ka caktuar rreth 66 miliardë euro që nga janari për të zbutur krizën energjetike të përkeqësuar nga lufta në Ukrainë. Pasardhësi i tij ndoshta do të duhet të ecë në të njëjtën rrugë.

Është e mundur që Meloni mund të vendosë objektiva të rinj menjëherë pas marrjes së detyrës nëse beson se shkurtimet e premtuara të taksave dhe masat e shpenzimeve mund të stimulojnë ekonominë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.