Japonia bën histori si vendi i pestë që zbarkon në Hënë!

Japonia u bë vendi i pestë në histori që arriti në Hënë kur anija e saj kozmike u ul në sipërfaqen hënore herët të shtunën, thanë zyrtarët. Por një problem me furnizimin me energji do të thotë se misioni mund të jetë në rrezik.

Zyrtarët thanë gjithashtu se u duhej më shumë kohë për të analizuar nëse anija kozmike, e cila nuk mbante astronautë, bëri një ulje të saktë – një nga prioritetet e misionit.

Hitoshi Kuninaka, kreu i Institutit të Shkencës Hapësinore dhe Astronautike, tha se ata besojnë se roverët u nisën dhe të dhënat po transmetoheshin përsëri në Tokë nga Smart Lander për Hetimin e Hënës, ose SLIM.

Por ai tha se bateria diellore e SLIM nuk po gjeneronte energji dhe jeta e baterisë së anijes kozmike do të zgjaste vetëm disa orë të tjera. Ai tha se prioriteti tani ishte që anija të mblidhte sa më shumë të dhëna të Hënës për baterinë e mbetur.

Japonia ndjek Shtetet e Bashkuara, Bashkimin Sovjetik, Kinën dhe Indinë në arritjen e Hënës. Kuninaka tha se ai beson se programi hapësinor i Japonisë së paku arriti suksesin “minimal”.

Ekspertët thonë se një sukses i uljes së saktë të SLIM, veçanërisht në Hënë, do të rriste profilin e Japonisë në garën globale të teknologjisë hapësinore.

Takeshi Tsuchiya, profesor i aeronautikës në Shkollën e Lartë të Inxhinierisë në Universitetin e Tokios, tha se ishte e rëndësishme të konfirmohej saktësia e uljes në një zonë të synuar për të ardhmen e eksplorimeve të Hënës.

“Është e nevojshme t’i tregojmë botës se Japonia ka teknologjinë e duhur në mënyrë që të jetë në gjendje të pohojë siç duhet pozicionin e Japonisë në zhvillimin hënor,” tha ai.

Hëna është e rëndësishme nga këndvështrimi i eksplorimeve të burimeve dhe mund të përdoret gjithashtu si bazë për të shkuar në planetë të tjerë, si Marsi, tha ai.

SLIM mban dy sonda të vogla autonome – automjetet e ekskursionit hënor LEV-1 dhe LEV-2, të cilat do të lëshohen pak para uljes.

LEV-1, i pajisur me një antenë dhe një kamerë, ka për detyrë të regjistrojë uljen e SLIM. LEV-2, është një rover në formë topi i pajisur me dy kamera, i zhvilluar nga JAXA së bashku me Sony, prodhuesin e lodrave Tomy dhe Universitetin Doshisha.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.