“Kadastra, më problematikja për shërbimet online”. Anketa e Këshillit të Investimeve nxjerr në pah shqetësimet e bizneseve

Një anketë e Këshillit të Investimeve, i kryer gjatë korrikut 2023 dhe i sapo publikuar, lidhur me cilësinë e shërbimeve publike dixhitale sipas këndvështrimit të bizneseve, ka nxjerrë në pah se sipërmarrjet në tërësi janë të kënaqura me ofrimin e shërbimeve online. Këto shërbime, sipas tyre kanë ndikuar në uljen e barrës administrative  dhe praktikat korruptive për shkak të shmangies së kontaktit fizik me administratën publike.

Por, Agjencia Shtetërore e Kadastrës cilësohet si institucioni më problematik për përfitimin e shërbimeve online brenda platformës e-Albania dhe mbështetjes së ofruar në marrjen e shërbimeve. Bizneset vërejnë mungesë të digjitalizimit në nivel vendor, shërbimet elektronike të të cilit konsiderohen në nivel bazik.

Po ashtu,  vlerësohet e-Albania si portal lehtësisht i aksesueshëm por, si elementë më problematikë gjatë përdorimit.

Në anketë thuhet se biznesi është i gatshëm të përdorë pagesat online për përftimin e  shërbimeve elektronike, por problematike mbetet çështja e sigurisë së të  dhënave.

Pavarësisht se mbështetet ofrimi i shërbimeve online, biznesi kërkon rihapje edhe të pikave fizike për përftimin e shërbimeve për arsye të  pamundësisë së përdorimit të platformave online apo edhe mungesës së mbështetjes institucionale.

Nga ana tjetër, pak ditë më parë u zhvillua një takim mes kryeministrit dhe përfaqësuesve të shoqatave të biznesit për derregullimin  ku u njoftua nisja e një procesi diskutimi me sipërmarrjen për lehtësimin e shërbimeve ndaj saj. Në fokus të këtij procesi u theksua  se do të jetë identifikimi i problemeve që has sipërmarrja shqiptare, me qëllim që më pas të bëhen dhe ndërhyrjet e nevojshme ligjore për eleminimin e tyre.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.