Kaos në tregun e kriptomonedhave – “Hakohet” llogaria e SEC, postohet lajmi se ETF-të janë miratuar

Tregu i kriptomonedhave është përfshirë nga kaosi për pak orë, për shkak të një postimi të rremë në llogarinë e “X” të Komisionit të Letrave me Vlerë dhe Shkëmbimeve të SHBA, ku thuhej se janë miratuar ETF-të e para. Por, më vonë Komisioni e fshiu postimin dhe tha se ende nuk është bërë asnjë miratim.

Bitcoin është kthyer në rënie në sesionin e sotëm europian, ndërsa të martën tregu u përfshi nga kaosi, pas një postimi të rremë në mediat sociale nga llogaria në “X” e Komisionit të Letrave me Vlerë dhe Shkëmbimeve të SHBA, që deklaronte se agjencia kishte miratuar fondet e tregtuara në shkëmbim në bitcoin. Por, më vonë Komisioni i Letrave me Vlerë e fshiu postimin dhe tha se dikush hyri në llogarinë e tij në rrjetin social “X” dhe postoi mesazhin e rremë. Komisioni shtoi se ende nuk ka miratuar asnjë fond ETF në bitcoin.

Fillimisht, kriptomonedha më e madhe në botë u rrit në nivelin më të lartë në 21 muajt e fundit, prej 47,901 dollarë, niveli më i lartë që nga marsi i vitit 2022, por më pas ra në 44,800 dollarë, brenda pak minutash.

Megjithatë, tregu është optimist se shumë shpejt Komisioni i Letrave me Vlerë do të miratojë fondet ETF në bitcoin. Sipas analistëve, kjo ngjarje “bumerang” me volum të lartë ndoshta i trembi njerëzit, por reagimi fillestar i tregut është inkurajues duke supozuar se miratimi do të ndodhë.

Që nga dita e hënë, investitorët kanë qenë në pritje të një përditësimi nga autoriteti amerikan i letrave me vlerë, me disa që shpresonin se vendimi do të vinte më herët. E mërkura shënon afatin përfundimtar për Komisionin, që të miratojë ose të refuzojë aplikacionin Ark 21Shares të Ark Invest.

Besohet gjerësisht se agjencia do të miratojë disa aplikacione në të njëjtën kohë. Në tre muajt e fundit, bitcoin është rritur me rreth 60%, kryesisht si rezultat i spekulimeve për miratimin e ETF-ve. Për më tepër, investitorët kanë pasur fitime të larta të parealizuara, një trend që historikisht i paraprin korrigjimeve të çmimeve.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.