Nafta Brent ngjitet pranë 77 USD – Rezervat në SHBA ranë me 5.2 mln fuçi, gjatë javës së kaluar

Nafta po tregtohet e qëndrueshme pranë 77 dollarëve për fuçi në sesionin e sotëm, për shkak të rënies së rezervave të naftës në SHBA, gjatë javës së kaluar. Megjithatë, çmimet po gjejnë një mbështetje nga tensionet në Lindjen e Mesme. 

Nafta po qëndron në rritje në sesionin e sotëm, duke zgjeruar fitimet e një dite më parë, pasi të dhënat e industrisë në SHBA treguan se rezervat e naftës bruto ranë më shumë se parashikimet gjatë javës së kaluar.

Nafta Brent e Londrës po tregtohet në rreth 77.5 dollarë për fuçi, ndërsa nafta Bruto amerikane po tregtohet në rreth 72.3 dollarë për fuçi. Të dyja kontratat u rritën me 2% në sesionin e kaluar, për shkak të krizë në Lindjen e Mesme dhe shkurtimeve të furnizimit nga Libia.

Fokusi i tregjeve vijon të jetë i përqendruar te balancimi i tregut mes kërkesës dhe ofertës. Rezervat e naftës bruto në SHBA ranë me 5.2 milionë fuçi, gjatë javës që u mbyll më 5 janar, referuar të dhënave të publikuara nga Instituti Amerikan i Naftës. Analistët parashikonin një rritje të rezervave me 500 mijë fuçi.

Megjithatë, analistët po presin të dhënat zyrtare që do të publikohen më vonë gjatë ditës së sotme nga Adminstrata për Informimin mbi Energjinë. Në kahun e ofertës, prodhimi i naftës bruto në SHBA pritet të arrijë nivele rekord, gjatë dy viteve të ardhshme, por do të rritet me një ritëm më të ngadaltë, tha Agjencia Ndërkombëtare e Energjisë.

Në Lindjen e Mesme, Sekretari amerikan i Shtetit, Antony Blinken i kërkoi Izraelit të bënte “zgjedhje të vështira” për të normalizuar marrëdhëniet me fqinjët e tij, një thirrje e re për të zbutur rrugën drejt krijimit të një shteti palestinez. Investitorët po vëzhgojnë të dhënat për të përcaktuar se kur Rezerva Federale mund të fillojë të ulë normat e interesit.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.