Kina po përpiqet të rivalizojë ChatGPT-4 të SHBA me Ernie 4.0!

Gjigandi kinez i teknologjisë Baidu zbuloi një version të ri të modelit të tij të inteligjencës artificiale (AI) të martën që pretendon se do të rivalizojë ChatGPT-4 të kompanisë amerikane OpenAI.

CEO miliarder i Baidu, Robin Li, prezantoi Ernie 4.0 në konferencën botërore të kompanisë në Pekin. Ai tha se roboti mund të kuptojë pyetje dhe udhëzime komplekse dhe të zbatojë arsyetimin dhe logjikën për të gjeneruar përgjigje për pyetjet duke përdorur algoritme.

“Nuk është inferior në asnjë aspekt ndaj GPT-4,” tha Li, duke deklaruar se modeli i fundit ishte “përmirësuar ndjeshëm” në krahasim me modelin e tij origjinal Ernie Bot. Në një demonstrim të drejtpërdrejtë, Li i kërkoi Ernie 4.0 të gjeneronte materiale reklamuese duke përfshirë postera dhe një video marketingu, të cilën e bëri brenda pak minutash. Ai gjithashtu i kërkoi Ernie 4.0 të dilte me një roman të arteve marciale të kompletuar me personazhe me personalitete të ndryshme.

Baidu është një kryesues në mesin e një morie kompanish kineze që garojnë për të krijuar modele të AI pasi ChatGPT i OpenAI-it e pushtoi botën vitin e kaluar. Pekini e sheh inteligjencën artificiale si një industri kyçe për të rivalizuar Shtetet e Bashkuara dhe synon të bëhet një lider global deri në vitin 2030.

Kina kohët e fundit ka kërkuar të rregullojë industrinë gjeneruese të AI, duke u kërkuar kompanive të kryejnë rishikime të sigurisë dhe të marrin miratimet përpara se të lançojnë publikisht produktet e tyre. Kompanitë që ofrojnë shërbime të tilla të AI duhet gjithashtu të përmbushin kërkesat e qeverisë për teknologji dhe të dhëna. SHBA nuk ka rregulla të tilla.

Baidu me bazë në Pekin filloi si një firmë motori kërkimi dhe gjatë dekadës së fundit, ka investuar shumë në teknologjinë e inteligjencës artificiale, si ngarje autonome dhe së fundmi, AI gjeneruese për të qëndruar konkurrues.

Baidu prezantoi Ernie Bot-in e tij në mars. Në gusht, modeli u bë i disponueshëm për publikun. Ernie 4.0 nuk është ende i disponueshëm për publikun e gjerë, por disa njerëz janë ftuar ta provojnë.

Li tha se Baidu planifikon të inkorporojë teknologjinë AI në motorin e tij të kërkimit, hartat dhe shërbimet e disqeve cloud, dhe ofertat e tij të inteligjencës së biznesit për klientët e ndërmarrjeve. Ai nuk dha një orar për këtë.

Teknologjia mund të transformojë mënyrën se si funksionojnë produkte të caktuara. Motori i kërkimit i Baidu mund të gjenerojë një përgjigje të personalizuar për një pyetje në vend që të sigurojë vetëm një listë rezultatesh dhe lidhjesh.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.