Kolosët e teknologjisë dhe konsumi i energjisë – Facebook, Amazon, Apple, Netflix, Google shpenzojnë më shumë se Portugalia e Greqia

Brenda një viti pesë kolosët e teknologjisë Facebook, Amazon, Apple, Netflix e Google, kanë konsumuar një sasi energjie elektrike e barabartë me 49.7 milion megavat orë, sasi më e lartë se e Portugalisë 48.4 milion megavat dhe se e Greqisë 46. 2 milion. Pothuajse të njëjtën sasi sa Rumania – 50 milion megavat orë.

Që nga viti 2018 deri në vitin 2020 konsumi i energjisë së pesë kolosëve amerikanë të kuotuar në Nasdaq, është trefishuar pothuajse duke kaluar nga 16.6 në 49.7 milion megavat orë.

Shifrat janë publikuar nga ESG Karma Metrix, që ka analizuar bilancet e pesë kompanive, të prezantuara nga agjencia e marketingut dixhital AvantGrade.com.

Nga këto raporte rezulton gjithashtu se pesë kompanitë teknologjike kanë emetuar 98.7 milion ton dioksid karboni, më shumë se e gjithë Republika Ceke – 92.1 milion ton. Dhe emetimi i dioksidit të karbonit është shtuar me 17 nga viti 2018 në 2020-ën.

Mes pesë kompanive gjithsesi ka sinjale pozitive për reduktimin e dioksidit të karbonit nga ana e Apple dhe Google, sipas studimit, falë peshës më të madhe të burimeve energjitike të rinovueshme dhe kërkimeve aktive të efikasitetit energjitik në qendrat e tyre të të dhënave.

Interneti prodhon emetime të dioksidit të karbonit si për shkak të mënyrave pak efikase të realizimit të uebeve dhe aplikacioneve, por dhe për lëndët djegëse fosile që furnizojnë qendrat e të të dhënave. Sipas Projektit Global për Karbonin, nëse Interneti do të ishte një komb, do të ishte vendi i katërt në botë për sa i përket ndotjes së ambientit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.