Komentet e FED mbështesin dollarin – Powell: Inflacioni nuk do të shkojë në objektiv deri në vitin 2025

Dollari është forcuar në sesionin e së mërkurës, ndërsa sot po shfaqet i qëndrueshëm, pasi gjeti një mbështetje nga komentet e bëra nga shefi i Rezervës Federale, Jerome Powell, në konferencën e organizuar nga Banka Qendrore Europiane.

Gjatë fjalës së tij, Powell sinjalizoi të tjera rritje të normave të interesit, ndërsa e radhës mund të vijë në takimin e korrikut. Duke folur në konferencë, së bashku me guvernatorin e Bankës së Anglisë, Andrew Bailey, Presidenten e BQE, Christine Lagarde dhe me Guvernatorin e Bankës së Japonisë Kazuo Ueda, Powell sinjalizoi edhe dy rritje të tjera gjatë këtij viti, ndërsa shtoi se nuk shpreson që inflacioni të shkojë brenda objektivit prej 2% deri në vitin 2025.

Pas komenteve të shefit të Rezervës Federale, indeksi që mat ecurinë e dollarit amerikan përballë shportës me 6 monedhat kryesore ndërkombëtare, po qëndron në rreth 103, ndërsa euro po qëndron pranë 1.09 dollarëve. Në anën tjetër, Lagarde u shpreh se BQE nuk po shikon fakte të mjaftueshme për të besuar se inflacioni po ngadalësohet ndjeshëm. Në tregun e kriptomonedhave, bitcoin po këmbehet në rreth 30,340 dollarë, ndërsa ethereum po qëndron në rreth 1850 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.