Bursat europiane, me ndryshime të vogla – Rriten me rreth 5%, gjatë qershorit, teknologjia realizon fitimet më të mëdha

Bursat europiane kanë ndryshuar shumë pak në fillim të sesionit të sotëm, për shkak se investitorët po vlerësojnë komentet e bankierëve qëndrore, të cilat thanë në Forumin e organizuar nga Banka Qendrore Europiane, se do të vijojnë me rritjen e interesave, për të luftuar inflacionin e lartë.

Indeksi pan-Europian Stoxx 600 e ka nisur ditën në rënie të lehtë me 0.1%, ndërsa sektori i udhëtimeve kryeson humbjet, në rënie me 0.8%. Në konferencën e Sintras në Portugali, Presidentja e BQE, Christine Lagarde, Guvernatori i Bankës së Anglisë, Andrew Bailey dhe presidenti i Rezervës Federale, Jerome Powell deklaruan sa do të rrisin më tej interesat, pavarësisht rreziqeve të rritjes ekonomike.

Gjithashtu, Lagarde shprehu edhe mundësinë që ekonomia e Eurozonës të futet në recesion, gjatë këtij viti. Gjatë këtij muaji, ndërkohë, indeksi STOXX 600 ka fituar rreth 5% të vlerës, ndërsa sektori i teknologjisë ka realizuar performancën më të mirë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.