Kompania që pritet të pushtojë tregun energjetik-Do të vendosë një bateri në çdo shtëpi

Një kompani e re synon te revolucionarizojë sektorin e furnizimit të energjisë elektrike.

Kompania është me bazë në Teksas, një shtet që e ka nisur ‘çlirimin’ e industrisë së tij energjetike nga rregullat e qeverisë më shumë se 25 vjet më parë dhe që atëherë është shfaqur si lider në energjinë e erës dhe atë diellore.

Këta faktorë i kanë dhënë hov ngritjes së ‘Base Poëer Inc.’, një kompani e bashkëthemeluar vitin e kaluar në Austin nga Zach Dell, djali i miliarderit të kompjuterave personalë Michael Dell.

‘Base’ është një ofrues i energjisë elektrike në shtëpi.

“Ne besojmë se rrjeti ekzistues i energjisë ka probleme,” thotë Dell, i cili është gjithashtu shefi ekzekutiv i kompanisë. “Është i vjetëruar, shumë i vogël dhe i pamirëmbajtur.”

‘Base’ kërkon të instalojë një sistem të ruajtjes së energjisë përmes baterisë në shtëpitë e konsumatorëve, kundrejt një kostoje prej 2 mijë dollarësh. Kjo bateri është ndërtuar për të ndihmuar njerëzit në momentet e ndërprerjes së energjisë dhe vjen me një çmim më të ulët, krahasuar me sistemet e ngjashme. Qëllimi i kompanisë është të krijojë një rrjet të gjerë baterish dhe të përdorë programe për të monitoruar çmimet e energjisë, në mënyrë që të mbushë bateritë kur energjia është e lirë e t’i heqë kur çmimi i saj të rritet.

‘Base’ ka arritur të mbledhë 68 milionë dollarë nga investitorët, por nuk mungojnë sfidat që e presin. Si fillim, konsumatorët duhet të gjejnë një vend për një bateri të madhe në shtëpitë e tyre, të realizojnë instalimin e pajisjes me një teknik të kompanisë dhe të ndryshojnë furnizuesin e energjisë. Një veprim i tillë kërkon gjithashtu një forcë të madhe shitëse dhe një sërë kontraktuesish për të trajtuar instalimet.

Të ndërrosh furnizuesin e energjisë nuk është aq e thjeshtë në Teksas, për shkak të disa burokracive në procesin e shkëputjes, por ndërprerjet e energjisë janë një problem real në këtë shtet. Në përgjithësi, ShBA-të nuk kanë investuar në infrastrukturën e energjisë gjatë dekadave të fundit ndërsa popullata dhe kërkesat janë shtuar. Kthimi i vëmendjes drejt alternativave të tjera si energjia diellore dhe e erës do të sjellë probleme, pasi funksionimi i tyre varet nga kushte specifike. Kjo e bën rrjetin më pak të besueshëm dhe hap rrugën për kompaninë ‘Base’.

Fillimisht, ‘Base’ është duke blerë teknologjinë e baterive dhe energjinë nga furnizuesit. Megjithatë, ata janë duke punuar me një sistem të brendshëm të ruajtjes së baterive që ka një model industrial të ngjashëm me Apple dhe mund të instalohet më shpejt. Në vitet në vijim, ‘Base’ planifikon gjithashtu të ndërtojë fermat e veta me erë dhe energji diellore. Deri tani kompania ka instaluar sisteme në një numër të vogël shtëpish dhe thotë se ka disa qindra njerëz në listën e pritjes.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.