Konsumet energjetike, 32 mln lekë për databazën – Tenderi/ Duhen të dhënat për të gjithë sektorët. Përfshihet edhe transporti e bujqësia

Ndërtimi i databazës së plotë për konsumet energjetike në gjithë sektorët parashikohet të kushtojë rreth 32 mln lekë. Agjencia për Eficiencën e Energjisë ka hapur tenderin për përzgjedhjen e kompanisë, që do të hartojë bilancet energjetike për vitet 2023 -2025, duke saktësuar se të dhënat do të realizohen në nivel kombëtar dhe bashkiak për të gjithë sektorët e konsumit.

Këtu përfshihet sektori i transportit rrugor, hekurudhor, detar, ujor duke përfshirë, si transportin e pasagjerëve ashtu edhe transportin e mallrave. Po ashtu, sektori i bujqësisë, blektorisë, pyjeve e peshkimit, si dhe sektori i shërbimeve, rezidencial dhe ai industrial.

Sipas dokumenteve të tenderit përveç survejimit energjetik të detajuar të të gjithë këtyre sektorëve do të duhet të përcaktohen edhe treguesit bazë specifikë të eficiencës së energjisë për të gjitha shërbimet energjetike.

Paralelisht, do të përgatitet formati për mbledhjen e të dhënave për të gjithë konsumatorët e mëdhenj të energjisë. Për këta të fundit, pak ditë më parë hyri në fuqi edhe udhëzimi për llogaritjen e konsumit, duke përfshirë të gjitha burimet e energjisë që do të përdoren për klasifikimin si konsumator i madh.

Sipas dokumenteve të tenderit, përpunimi i të dhënave nga anketimet energjetike do të behet me metoda të unifikuara, në përputhje me standardet e EUROSTAT-it.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.