Kreditë me probleme vijojnë tendencat rënëse – Në mars arritën në 4.64%, niveli më i ulët në 10 vite

Portofoli i huave me probleme është përmirësuar edhe në muajin mars të këtij viti. Huatë me probleme ndaj totalit arritën në 4.64%, niveli më i ulët ky në 10 vitet e fundit.

Ecuria e kredive me probleme gjatë muajit mars të vitit aktual ishte ndjeshëm më e mirë se pritshmëritë. Sipas të dhënave nga Banka e Shqipërisë, në muajin e tretë të këtij viti huatë me probleme ndaj totalit arritën në 4,64% ndërkohë që në muajin shkurt ishin në nivelin e 4.69%.

Ndërkaq, nuk mund të themi të njëjtën gjë për treguesin e huave me probleme neto nga provigjonet ndaj kapitalit rregullator i cili shënoi një rritje të lehtë mujore duke u regjistruar në 5.67% të totalit, nga 5.58% që ishte  në shkurt. Edhe huatë me probleme neto nga provigjonet ndaj kapitalit aksioner kanë ndjekur një trajektore rritëse duke arritur në 5.34% të totalit në mars, kundrejt 5,18% që regjistruan një muaj më parë.

Ndërkohë gjatë vitit të kaluar niveli i këtyre huave është luhatur në intervalin e mbi  5% duke arritur një maksimum prej 5,3% në muajin gusht. Por cilësia e portofolit të kredive është përmirësuar gjatë  fundit të vitit 2023 dhe ka vijuar edhe në tremujorin e parë të këtij viti duke rrëzuar pritshmëritë fillestare sipas të cilave inflacioni dhe rritja në nivele rekord e normës bazë të interesit do të rriste nivelin e kredive me probleme.

Theksojmë se gjatë tremujorit të parë të vitit 2024 bankat treguan një kujdes të shtuar në miratimin e kredive. Gjithashtu gjatë kësaj periudhe pati një edhe ndryshim të sjelljes së biznseve dhe të individëve, të cilët u orientuan fort nga kreditimi në lekë, kundrejt huave në monedhën e përbashkët evropiane kjo nisur nga kushtet e tregut të brendshëm valutor.

Armela Duka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.