Kreditimi në lekë kushton më shtrenjtë – Kryesisht te huatë e mëdha për sipërmarrjet

Normat e interesit për kreditë për biznese janë rritur lehtas në tremujorin e parë të vitit për kreditë në lekë, ndërsa ato në euro nuk kanë ndryshuar. Sipas Bankës së Shqipërisë, rritja e interesit tek kreditë në lekë ka qenë kryesisht tek kreditë e mëdha, ndërkohë tek kreditë në euro janë interesat për kreditë e vogla ato që kanë regjistruar rritje gjatë këtij tremujori.

Norma mesatare e interesit për kreditë e reja në lekë për biznese në tremujorin e parë rezultoi 7.3%, nga 7% që ishte tremujorin e kaluar dhe 5.8% një vit më parë. Rritja e interesit këtë tremujor është formuar vetëm tek kategoria e kredive me vlera mbi 35 mln lekë, e cila ka regjistruar rritje graduale prej një viti. Interesi mesatar për këto kredi shënoi 7.0%, nga 6.4% dhe 6% që ishte në dy tremujorët paraardhës. Aktualisht, kjo është edhe kategoria ku ndryshimet e normës bazë vijojnë të reflektohen. Ndërkohë interesat e kredisë për overdraft dhe kapital qarkullues janë ulur këto tre muaj të parë të vitit, duke kontribuuar kështu në uljen e kostos së përgjithshme të financimit për bizneset.

Nga ana tjetër, norma e interesit për kreditë në euro të bizneseve rezultoi 5.4% në tremujorin e parë, duke qenë e njëjtë me tremujorin e mëparshëm, ndërkohë që vlera mesatare e saj për gjysmën e dytë të vitit të kaluar shënonte 5.1%.

Analiza sipas madhësisë së kredisë evidenton se interesat e kredisë për shuma deri 250 mijë dhe 1 mln euro, edhe pse në vlera minimale, janë në kahun rritës prej tre tremujorësh. Ndërkohë, interesat e kredive për shuma të mëdha (mbi 1 mln euro) vijojnë të luhaten, duke paraqitur shpesh vlera të ulëta gjatë këtyre muajve. Rritja e normës bazë për euron nga ana e BQE-së këtë periudhë po reflektohet më ngadalë tek interesat e kredisë në euro tek bizneset.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.