Krifca: Shqipëria bëhet anëtare e Organizatës Ndërkombëtare të Verës dhe Vreshtarisë (OIV)

Ministrja e Bujqësisë dhe Zhvillimit Rural, Frida Krifca bëri me dije se Shqipëria ka ndërmarrë disa hapa për të mbështetur sektorin e vreshtarisë dhe prodhimin e verës në Skemën Kombëtare të Mbështetjes dhe përafrimin e ligjit dhe dispozitave me atë të legjislacionit të Bashkimit Europian, i cili kulmoi me miratimin në parlament të ligjit të ri Nr. 86/2022 për Vreshtarinë dhe Verën, që rregullon më mirë sektorin dhe u mundëson prodhuesve shqiptarë të zgjerojnë mundësitë e tyre të eksportit.

Ajo njoftoi gjithashtu se vendi ynë është bërë tashmë anëtar i 50-të i Organizatës Ndërkombëtare të Verës dhe Vreshtarisë (OIV) falë mikroklimave të pasura të vendit tonë që krijojnë një terruar që ofron varietete lokale rrushi unike, të cilat po fitojnë popullaritet dhe janë kthyer në pikën e fortë të prodhuesve shqiptarë të verës. “Mjaft kantina janë kthyer nga punishte të vogla artizanale, në prodhues të mëdhenj që tashmë janë të aftë të garantojnë cilësinë dhe sasinë, duke mbyllur ekselencën dhe pasionin në një shishe, gati për dashamirësit e verës në të gjithë botën,” u shpreh Krifca.

Sipas njoftimit tashmë në Shqipëri janë të regjistruara 70 kantina, nga të cilat më shumë se 20 janë kantina të mëdha dhe disa prej tyre janë të përkushtuara për prodhimin e verës nga varietetet autoktone të rrushit si: Kallmet, Shesh (e bardhë dhe e kuqe) Serinë, Debinë (e bardhë dhe e kuqe), Puls, Cërrujë, Vlosh. “Këto varietete rrushi po fitojnë dalëngadalë popullaritet dhe janë bërë forca e verëbërësve shqiptarë, duke tërhequr adhuruesit e verës dhe profesionistët që tani kanë filluar të zbulojnë terruare dhe aroma të veçanta të verërave tona. Varietetet e tjera që janë përshtatur mirë me territorin dhe klimën e Shqipërisë janë: Merlot, Muskat, Riesling, Tempranillo, Cabernet Sauvignon etj.”

Krifca theksoi gji9thashtu se këta hapa të rëndësishëm çuan në një vendim të natyrshëm por shumë të rëndësishëm; atë të anëtarësimit në Organizatën Ndërkombëtare të Rrushit dhe Verës, duke hyrë kështu në diskutimin e rëndësishëm global për prodhimin e rrushit dhe verës. Sipas të dhënave të MBZHR, Shqipëria numëron rreth 11 mijë hektarë vreshta të varieteteve të ndryshme dhe gjatë viteve të fundit prodhimi i verërave është rritur me rreth 11.2 %, duke fituar qëndrueshmëri në volumin e prodhimit në rreth 190-195 mijë tonë/vit.

E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.