Largimi i industrisë së veshjeve nga Kina, mision i pamundur! – Arsyet janë cilësia e lartë dhe prodhimi masiv me çmime konkurruese

Kompanitë e veshjeve po zhvillojnë një marrëdhënie të përhershme varësie nga Kina, pasi përpjekjet e tyre për t’u shkëputur gradualisht nga “Dragoi i Kuq” duket se po bien në vesh të shurdhër. Gjigantët e veshjeve dhe këpucëve nga Adidas tek Nike kanë kërkuar të largojnë zinxhirët e tyre të furnizimit nga ekonomia e dytë më e madhe në botë për shkak të rritjes së tensioneve gjeopolitike dhe rritjes së kostove të prodhimit.

Por shumë prej tyre kanë vendosur të rikthehen. Në një sfond të pasigurisë ekonomike globale dhe kërkesës në rënie të konsumatorëve, ata po zbulojnë se gjetja e qendrave alternative të prodhimit ka sfidat e veta. Sipas drejtuesve të kompanive perëndimore të veshjeve, ekosistemi i pjekur, i krijuar gjatë dekadave në Kinë, jo vetëm që siguron çmime konkurruese, por gjithashtu ofron cilësi të qëndrueshme në prodhimin masiv që është e vështirë të kopjohet. Madje ata as nuk mund të mendojnë për një vend tjetër që kombinon cilësinë, sasinë dhe çmimin si Kina.

Në krahasim me kostot në një vend tjetër, në Kamboxhia pagat janë 30% më të ulëta, por në fabrikat kineze produktiviteti është 20% më i lartë.

Kina është tani një lidhje kaq e rëndësishme në zinxhirin global të furnizimit me veshje, saqë edhe vendet që po e braktisin atë nuk po e reduktojnë varësinë e tyre aq sa mendojnë. Industria e veshjeve të Vietnamit ende mbështetet, për shembull, kryesisht në materialet kineze si kopsat, fijet, etiketat dhe ambalazhet, me vetëm 30%-40% të materialeve që prodhohen në vend, sipas Shoqatës së Tekstileve dhe Veshjeve të Vietnamit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.