“Lëvizin” licencat për energjisë diellore – Pas 3 vitesh, 5 prodhues të rinj që do të përfitojnë nga masat mbështetëse të qeverisë     

Enti Rregullator i Energjisë ka licencuar 5 kompani në veprimtrinë e prodhimit të energjisë elektrike nga centrale fotovoltaike të vegjël, duke i hapur rrugë rritjes së kapaciteteve gjeneruese nga dielli. Këto janë licencat e para që jepen pas më shumë se 3 vitesh, nga koha kur është dhëna licenca e fundit për projekte që pëfitojnë nga masat mbështetëse të qeverisë, duke e çuar në 16 numrin e këtyre impianteve.

Secili prej centraleve të rinj do të ketë një fuqi të instaluar prej 2 MW, ndërkohë që të gjithë ndodhen në zonën e Bitinckës, në Bilisht. Interesi nga investitorët për ndërtimin e centraleve të vegjël diellorë ka qenë i lartë gjatë këtyre viteve, por 1 numër i vogël kanë arritur të marrin miratimet përfundimtare nga Ministria e Infrastrtukutrës dhe Energjisë, që më pas do i hapte rrugën lincencimit dhe ndërtimit të tyre.

Interesi u shtua ndjeshëm, pasi në vitin 2018, Këshilli i Ministrave miratoi masat mbështetëse për nxitjen e përdorimit të energjisë së prodhuar nga era e dielli, duke synuar arritjen e objektivit të përcaktuar në Planin Kombëtar të Veprimit për Burimet e Rinovueshme të Energjisë.

Këto masa garantojnë kontrata për blerjen e energjisë elektrike të prodhuar, me një kohëzgjatje maksimale për 15 vjet, si dhe lidhjen dhe aksesin për përdorimin e rrjetit të transmetimit/shpërndarjes së energjisë së prodhuar.

Vendimi parashikon edhe një sërë masash të tjera lehtësuese, por sikurse tregojnë edhe të dhënat e licencimeve nga ERE, pak kompani kanë arritur të përfitojnë. Të dhënat e prodhimit të energjisë nga impiantet fotovoltaike janë modeste, në raport me energjinë totale të prodhuar, pasi për 4-mujorin e parë të këtij viti sasia e prodhuar nga dielli arriti në 0.48% të totalit.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.