Ligj i ri për koncesionet në vitin 2025 – Kontroll i shtuar mbi kontratat dhe “ruajtje” e shtetit nga humbjet

Qeveria do të nisë punën për hartimin e një ligji të ri për koncesionet dhe partneritetin publik privat, i cili synon të reduktojë problematikat e shfaqura deri më tani me kontratat e lidhura midis institucioneve publike dhe kompanive private.

Në dokumentin “masat prioritare në kuadër të Reformës së Administratës Publike 2023 -2030″ të hedhur për konsultim publik, bëhet me dije se ligji i cili parashikohet të miratohet në fund të viti 2025, do të paraprihet nga hartimi dhe miratimi i metodologjisë për inventarizimin, vlerësimin dhe zhvlerësimin e aseteve në sektorin publik, e cila do të jetë gati deri në mesin e vitit 2025.

Po ashtu parashikohet të miratohet edhe metodologjia për vlerësimin e projekteve të reja koncesionare/PPP – deri në fund të vitit 2026. Këto ndryshime ligjore  synojnë  plotësimin e bazës së të dhënave të kontratave të monitoruara dhe ndjekjen e procesit të monitorimit të kontratave koncesionare/PPP në vazhdim; Forcimin dhe zhvillimin e kapaciteteve të institucioneve qeveritare për monitorimin e kontratave koncesionare/PPP  në vazhdim; Krijimi i mekanizmave efikasë në lidhje me monitorimin e kontratave koncesionare/PPP, në mënyrë që risqet e palëve kontraktuese, me fokus të shtuar tek autoritetet kontraktore, të jenë sa më të ulëta për të siguruar përfitimin dhe dobinë më të madhe të këtyre kontratave.

Forcimi i rolit të autoriteteve kontraktore në përcaktimin e procedurave që zgjidhen për kontratat publike, për të vlerësuar se cilat procedura maksimizojnë “vlerën më të mirë për paranë” dhe “vlerën për njerëzit” deri në fund të vitit 2026.

Duket se kjo iniciative është ndërmarrë duke iu referuar historikut të kontratave koncesionare në vendin tonë, ku disa prej tyre kanë dështuar në ofrimin e shërbimeve si dhe janë bërë barrë për buxhetin e shteti.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.