Liria e lëvizjes me kartë identiteti në Ballkanin Perëndimor / Balla: Rreth 8.5 milion hyrje-dalje janë kryer në Republikën e Shqipërisë

Ministri i Brendshëm Taulant Balla ka qenë i pranishëm në seancën dëgjimore në Komisionin për Çështjet Europiane ku ka folur për Marrëveshjen për lirinë e lëvizjes me Karta Identiteti në Ballkanin Perëndimor.

“Lëvizja e lehtësuar në 6 vendet e Ballkanit Perëndimor me karta identiteti është një marrëveshje rajonale, e cila krijon mundësinë për një rajon më të bashkuar, të lidhur më mirë me njëri-tjetrin. Në fakt, të gjitha vendet janë përfituese, por më përfitues janë qytetarët e vendeve tona. Në fakt, marrëveshja ka hyrë në fuqi në qershor të vitit 2023, ndërkohë që vendi i fundit që ka firmosur dhe ka ratifikuar ka qenë Serbia, e cila përmes shkresës së 31 korrikut 2023 ka njoftuar edhe adoptimin e kësaj marrëveshje” është shprehur Balla.

Ministri u shpreh se, “në Republikën e Shqipërisë, falë kësaj marrëveshje, në një total hyrje-dalje, janë 8 milionë e 501 mijë shtetas, ndër të cilët, përveç shtetasve shqiptarë që kanë përfituar nga kjo marrëveshje, ajo që bie në sy janë shtetasit kosovarë. Janë shtetasit që janë përfituesit më të mëdhenj në numër në raport me Shqipërinë, sepse bëhet fjalë për hyrje në Shqipëri. 2.26 milionë kanë hyrë në Shqipëri vetëm me karta identiteti falë kësaj marrëveshjeje. Ndërkohë shtetasit e Malit të Zi janë 250 mijë hyrje dhe 239 mijë dalje. Hyrje nga shtetas të Maqedonisë së Veriut me 353 mijë hyrje dhe 348 mijë dalje dhe pastaj boshnjakët dhe më pak shtetasit serbë”.

Balla theksoi se, “kjo është një marrëveshje që duhet bashkëshoqëruar edhe me një element tjetër thelbësor, në lehtësimin e kalimit në pikat e kalimit kufitar. Bëhet fjalë për ato që lidhen me lehtësinë e kontrollit në kalimin kufitar”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.