Mallrat shqiptare, në ‘sitën e cilësisë’ së organeve të BE! Nis me qumështin

Komiteti Kombëtar i Lehtësimit të Tregëtisë zhvilloi mbledhjen e radhës ku një nga temat e diskutimit ishte rritja e cilësisë dhe plotësimi i standardeve të kërkuara për eksportimin e produkteve shqiptare.

Për çështjen e cilësisë se eksporteve ministrja e Financave dhe Ekonomisë Delina Ibrahimaj theksoi se qeveria ka ndërmarrë angazhimin për të mundësuar vlerësimin nga organet e Bashkimit Europian për të gjithë produktet me bazë shtazore. E para industri që do ti nënshtrohet vlerësimit nga organet e BE do të jetë ajo e qumështit.

“Lajmi i mirë është që do të fillojmë me industrinë e qumështit gjatë këtij viti, në bashkëpunim me Ministrinë e Bujqësisë dhe AKU, dhe uroj që çdo që të shkojë mirë. Sigurisht që do të ketë problematika, por do të shërbejë si nxitje me qëllim përmirësimin, që në të ardhmen do t’i shërbejë të gjithë industrisë së qumështit”, tha Ibrahimaj.

Ministrja e Finacave dhe Ekonomisë Delina Ibrahimaj në këtë takim theksoi se biznesi dhe qeveria duhet të forcojnë dialogun mes tyre pasi qëllimi final është zhvillimi i ekonomisë dhe sektorëve të saj ne vend.

Gjithashtu bashkëpunim sa më të shpejt duhet të kenë dhe dhomat e tregtisë me biznesin pasi duhen bërë studime sektoriale për konkurrueshmërinë e vendit si në kuadër të Ballkanit të Hapur, Procesit të Berlinit, CEFTA-s dhe procesit të integrimit europian.

Ibrahimaj sugjeroi që disa industri duhet të subvencionohen dhe t’u krijohen lehtësira. Përmes mbështejeteve të politikave fiskale nuk ka rezultuar e suksesshme në disa sektorë të caktuar pasi ka prodhuar informalitet.

Sektori i parë që do të nisin subencionimet do të jetë Bujqësia pasi jep 20% të PBB dhe ka rëndësi të madhe në punësim dhe në zhvillimin e ekonomisë së vendit.

Një tjetër temë diskutimi gjatë mbledhjes ishte dhe mundësia e një marrëveshjeje të tregtisë së Lirë me Japoninë. Ibrahimaj ftoi shoqatat e biznesit që të bëjnë propozimet e tyre për produkte specifike, në mënyrë që të përfshihen në diskutime me shtetin japonez.

Diamila Leka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.