Maroku “pushton” tregjet e Europës – Bujqësia marokene përfiton nga fuqia punëtore pesë herë më e lirë

Ambicia e Marokut nuk njeh kufij. Vendi i Afrikës Veriore dëshiron të bëhet një forcë globale agroushqimore dhe mbi të gjitha të pushtojë tregjet europiane me produktet e tij të frutave dhe perimeve. Vendi nuk po përpiqet të fshehë planet e tij, siç dëshmohet nga fakti se ajo ndërtoi një megaqytet në Sahara për të rritur domate dhe pjepër, me të cilët do të vërshonte Kontinentin e Vjetër me çmimet e ulëta.

Çfarë fshihet pas rritjes së bujqësisë? Ekspertët besojnë se çelësi është, pa dyshim, puna e lirë, një faktor përcaktues për konkurencën e produkteve bujqësore që Maroku eksporton. E ndërsa fermerët europianë protestojnë prej javësh, ndër të tjera, për atë që ata e shohin si konkurencë të pandershme, profesionistët marokenë po mbrohen, duke argumentuar se po ulin edhe marzhet e fitimit.

Ashtu si homologët e tij europianë, sektori bujqësor i Marokut, i cili përbën 14% të PBB-së kombëtare, ankohet se përballet me kufizime në përdorimin e ujit për vaditje për shkak të thatësirës së madhe të vendit dhe gjithashtu për shkak të rritjes së tarifave të vendosura nga Mauritania për frutat dhe perimet nga Maroku.

Në Spanjë, zemërimi rural u përkthye në incidente me fermerët që sulmuan kamionët marokenë të ngarkuar me domate. Spanjollët ankohen se ata nuk u nënshtrohen të njëjta kushteve dhe kërkesave si të tjerët.

Një gjest që zemëroi fermerët dhe anëtarët e sindikatave në Marok, të cilët sigurojnë se po organizojnë edhe demonstrata për të luftuar për gjendjen e tyre, por që nuk do t’u shkonte kurrë ndërmend të sulmonin transportuesit.

Europianët pohojnë se avantazhi më i madh i Marokut ndaj Spanjës është kostoja e punës. Ata paguajnë nga 10 deri në 20 euro në ditë pune, gati 5 herë më pak se paga ditore spanjolle.

Sipas të dhënave të Fepex, midis janarit dhe shtatorit 2023, Bashkimi Europian importoi fruta dhe perime të freskëta në vlerë prej 1.844 miliardë eurosh nga Maroku. Në këtë mënyrë, vendi bëhet furnizuesi kryesor jashtë BE-së në aspektin ekonomik, i ndjekur nga Afrika e Jugut dhe Peruja.

Megjithatë, profesionistët marokenë mbrojnë faktin se pavarësisht kostove të favorshme të punës, ata kanë kosto të tjera që minimizojnë përfitimet e tyre, si rritja e kostove të transportit. Në këtë kuptim, ata vënë në pah rritjen e çmimeve të plehrave, por edhe të farërave. Dhe pa farat e domates, për shembull, ata nuk do të jenë në gjendje të tregtojnë produktin.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.