Masa ndëshkuese për profesionet në ndërtim. Ngrihet komisioni disiplinor për kontrollin e punimeve

Një komision disiplinor do të ngrihet për kontrollin dhe disiplinimin e punimeve të ndërtimit. Ka hyrë në fuqi vendimi mbi mënyrën e funksionimit të komisionit dhe masat ndëshkuese ndaj subjekteve që kanë shkelur standardet shqiptare dhe evropiane të ndërtimit.

Komisioni disiplinor nis një procedurë që përcakton masa ndëshkuese pas evidentimit të shkeljeve të dispozitave lidhur me profesionet në fushën e ndërtimit dhe ushtrimin e veprimtarive të tyre përkatëse. Ndaj projektuesit, mbikëqyrësit dhe zbatuesit të punimeve, drejtuesit teknik apo kolaudatorit, parashikohen masa disiplinore si paralajmërim me shkrim për shkeljet që ndodhin për herë të parë, trajnime shtesë në fushën e tyre profesionale, pezullim të licencës për një afat të caktuar, ose heqje përfundimtare e të drejtës së ushtrimit të profesionit.

Kur zbatuesi ka rifilluar punimet pa u konfirmuar nga mbikëqyrësi dhe pa u miratuar nga zhvilluesi për riparimet e dëmeve të shkaktuara në infrastrukturën publike gjatë zbatimit të këtyre punimeve, si dhe kur dëmi nuk mundet të riparohet, ose ka sjellë pasoja për rrezikimin e jetës dhe sigurinë në përdorim të objektit, ndëshkohet me heqje përfundimtare të licencës për ushtrimin e profesionit.

Nga ana tjetër, projektuesi i objektit të ndërtimit urdhërohet të kryejë trajnim shtesë kur nuk ka respektuar kodin e etikës profesionale, kur mënyra e aplikimit të standardeve shqiptare dhe atyre evropiane në projektim nuk është sipas përcaktimeve në to dhe udhëzuesve për zbatimin e tyre, dispozitat antisizmike, të sigurisë, mbrojtjes nga zjarri, higjieno-sanitare, si dhe eficiencës së energjisë.

Të gjithë profesionet që ushtrojnë veprimtarinë e tyre në fushën e ndërtimit, do të pezullohen nga detyra për një periudhë deri në pesë vjet, vetëm nëse kanë kryer një dëm që mund të riparohet pa sjellë pasoja për rrezikimin e jetës dhe sigurinë në përdorim të objektit, ose kur dëmi financiar është në atë shkallë që të mos kalojë shumën e sigurimit të përgjegjësisë profesionale.

Duke parë bumin e madh të ndërtimeve të reja në vitet e fundit, masa më të rrepta për subjektet që operojnë në fushën e ndërtimit shihen si të domosdoshme, me qëllim respektimin e standardeve dhe rregullave në këtë sektor që parashikon legjislacioni në fuqi. Vetëm në vitin 2023 janë dhënë gjithsej 1,602 leje ndërtimi, rritje kjo me 12.8% krahasuar me vitin e mëparshëm, ndërsa pritet që ky numër të jetë më i lartë gjatë këtij viti.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.