Tkurret” kërkesa botërore për naftë. Pritet që edhe çmimet e “arit të zi” të ulen deri në fund të vitit
Kërkesa botërore për naftë këtë vit pritet të rritet më pak se parashikimi i mëparshëm dhe prodhimi duhet të zgjerohet më shpejt, duke rezultuar në një treg më të balancuar, deklaroi Administrata e Informacionit të Energjisë në SHBA (EIA).
Agjencia rriti parashikimet e saj të prodhimit nga rajonet jashtë Organizatës së Vendeve Eksportuese të Naftës, duke ulur gjithashtu pritjet e saj për kërkesën nga ekonomitë e zhvilluara, sipas një përditësimi mujor të Perspektivës Afatshkurtër të Energjisë (STEO).
EIA tani pret që konsumi global i naftës dhe lëndëve djegëse të lëngshme të rritet me 920,000 fuçi në ditë (bpd) këtë vit në 102.84 milionë bpd, pak më i vogël se parashikimi i prillit prej 950,000 bpd.
Përmirësimi i bilancit të tregut çoi gjithashtu në një ulje të parashikimeve për çmimet e naftës në pjesën tjetër të vitit.
Tashmë pritet që çmimet e naftës së papërpunuar Brent të jenë mesatarisht 90 dollarë për fuçi në tremujorin e tretë dhe të bien në 88.67 dollarë në tremujorin e fundit të vitit. Parashikimi i mëparshëm tregonte për çmimet e Brent mbi 91 dollarë në tremujorin e tretë dhe mbi 89 dollarë në të katërtin.
Për SHBA-në, prodhuesin kryesor në botë të naftës, Administrata e Informacionit të Energjisë uli parashikimin e të prodhimit për këtë vit në 13.20 milionë fuçi në ditë, ende një rekord i lartë, por pak më poshtë parashikimit të mëparshëm prej 13.21 milionë.
Administrata e Informacionit të Energjisë pret që disa prodhues në OPEC+, i cili përfshin OPEC dhe aleatët e tij, të kufizojnë prodhimin e tyre pasi shkurtimet aktuale vullnetare skadojnë në fund të qershorit.
Tre burime të OPEC+ thanë javën e kaluar se grupi ende nuk ka filluar bisedimet zyrtare për zgjatjen e shkurtimeve, por ai mund t’i zgjasë ato nëse kërkesa nuk rritet. Takimi i radhës i grupit është më 1 qershor.
Dorian Koca/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.