Masa për “kalimin” e bizneseve në pikat kufitare – Mete: Sportele “One Stop Shop” dhe heqje e barrierave jo tarifore
Qeveria shqiptare po merre masa për të lehtësuar tregtinë me vendet e Ballkanit Perëndimor dhe ato Europiane, duke synuar heqjen e barrierave jo-tarifore të cilat krijojnë pengesa burokratike dhe vështirësi në shkëmbimet tregtare. Ministri i Financave, Ervin Mete, mori pjesë në Konferencën Rajonale mbi Lehtësimin e Tregtisë, ku theksoi se digjitalizimi kërkon një qasje të re.
“Progresi i arritur në nivel politik përmes heqjes së tarifave doganore mes Bashkimit Evropian dhe vendeve të Ballkanit dhe mes vetë vendeve të rajonit tonë nëpërmjet marrëveshjeve të tregtisë së lirë, të Stabilizim-Asociimit dhe CEFTA-s, po plotësohet me masa teknike për heqjen e barrierave jo-tarifore, krijimin e pikave të përbashkëta të kontrollit “One Stop Shop”, njohjen reciproke të Operatorëve të Autorizuar Ekonomikë, si dhe përmes një sistemi të integruar të transitit. Në këtë drejtim, Ministria e Financave dhe Ekonomisë ka mbështetur idenë për fazën e dytë të projektit të Bankës Botërore për Lehtësimin e Tregtisë dhe Transportit. Ky propozim kërkon ndërmarrjen e një sërë masash, si dhe iniciativave të tjera, si Korsitë Blu, Korsitë e Gjelbra, etj” . Shembulli i ‘One Stop Shop” mes Shqipërisë dhe Kosovës, Malit të Zi dhe nga korriku 2023 edhe me Maqedoninë e Veriut, janë modele konkrete zbatimi se si është përgjysmuar koha dhe janë ulur kostot për operatorët ekonomikë mes vendeve të rajonit.
Sipas tij, konferenca është një mundësi e mirë për të angazhuar edhe doganat e tjera të Ballkanit Perëndimor që të lidhin marrëveshje të ngjashme me shtetet e tyre anëtare fqinje të BE-së.
“Po flasim për tregun e përbashkët evropian, me më shumë se 450 milionë konsumatorë, ku 85% e bizneseve të Ballkanit Perëndimor besojnë se produktet, mallrat dhe shërbimet e tyre jo vetëm që mund të mbijetojnë, por edhe mund të konkurrojnë me atë që 27 vendet e BE-së kanë aktualisht për të ofruar. Mbetet ende shumë për të bërë, por besoj se potenciali ekziston dhe ai duhet shfrytëzuar.“
Konferenca kishte si fokus evidentimin e problematikave që ekzistojnë në tregtinë rajonale në të gjithë sektorët e ekonomisë dhe përdorimin e teknologjisë në funksion të rritjes së bashkëpunimit dhe shkëmbimeve të ndërsjellta si dhe harmonizimi i procedurave doganore me ato të tregut të përbashkët Evropian.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.