“Bankat të menaxhojnë rreziqet që lidhen me klimën” – Sejko: Duhen investime që përputhen me përgjegjësinë mjedisore për të ruajtur ekosistemet

Ndryshimet klimatike nuk përbëjnë më një kërcënim të largët, por janë një realitet, i shprehur nëpërmjet ngjarjeve të paparashikuara të motit, probabiliteteve të rritura dhe të intensifikuara të fatkeqësive natyrore dhe deri në rritjen e impaktit negativ në bujqësi, turizëm dhe infrastrukturë. Si rrjedhojë, ndryshimet klimatike ushtrojnë presion të konsiderueshëm edhe në stabilitetin e sistemit financiare, i cili nuk mund të operojë i izoluar nga këto sfida.

Apeli vjen nga Guvernatori i Bankës së Shqipërisë, Gent Sejko, gjatë forumit t Nivelit të Lartë me temë “Klima, Makroekonomia dhe Financat: Risqet dhe ndikimet që i shoqërojnë”. Sipas tij, sektori bankar, si gur themeli i ekonomisë sonë, duhet të rrisë rezistencën jo vetëm ndaj goditjeve financiare tradicionale, por edhe ndaj forcës të paparashikuar të fenomeneve klimatike.

Për të vazhduar rrugën e rritjes së qëndrueshme, bankat tona duhet të menaxhojnë në mënyrë të vazhdueshme rreziqet që lidhen me klimën dhe të realizojnë investime që përputhen me përgjegjësinë mjedisore për të ruajtur ekosistemet, mikroklimat dhe burimet e tjera jetësore në nivel vendi. Ato duhet të jenë më të mirëpajisura për t’u adaptuar me shpejtësi dhe efektivitet ndaj një situate të re, duke përfituar nga mundësitë e krijuara nga kalimi në një ekonomi më të qëndrueshme dhe më të përgjegjshme ndaj mjedisit.

Banka e Shqipërisë e inkurajon sistemin bankar ta trajtojë këtë jo si një sfidë, por si një mundësi strategjike. Ne duhet të jemi të vetëdijshëm që përkrahja e financave të qëndrueshme nuk është vetëm mbrojtje për investimet tuaja, por edhe një investim për mirëqenien tonë të përbashkët.

Angazhimi për ndryshim transformues fillon brenda institucioneve tona, në mënyrë që falë bashkëpunimit të përmbushim premtimin për arritje të mëdha të përbashkëta. Si bankë qendrore, jemi të përkushtuar të vendosim standardin dhe të japim shembullin për aktorët në treg.

I pranishëm në forum, menaxheri i Zyrës së Bankës Botërore për Shqipërinë,  Emanuel Salinas, e vuri theksin te rëndësia që i kushton ky institucion ndryshimeve klimatike.

Duhet të përdoren të gjitha instrumentet financiare që kemi në dispozicion për të siguruar që kemi kryer investimet e mjaftueshme, duke i bërë ballë rreziqeve që vijnë nga ndryshimi i klimës. Kjo është një çështje në qendër të vëmendjes të Bankës Botërore në nivel global.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.