Mbi 200 mijë llogari të reja bankare në dy vite – Rritja më e madhe regjistrohet te individët rezidentë

Nga viti 2021 e deri në fund 2023-shit, në Shqipëri janë hapur 200 mijë llogari të reja bankare. Referuar të dhënave nga Banka e Shqipërisë, numri i llogarive bankare për individët rezidentë ka pasur tendencë rritjeje, ku vetëm për dy vitet e fundit rezulton të jenë hapur 100 mijë llogari të reja bankare. Shifrat flasin për 2.9 milionë llogari ekzistente në total për individët rezidentë dhe 58 mijë për individët jo rezidentë.

Ndërkohë për kompanitë konstatohet një ulje e ndjeshme e numrit të llogarive gjatë vitit të shkuar. Nga 239 mijë llogari bankare gjithsej për kompanitë rezidente, në vitin 2023 rezultojnë 7 mijë llogari më pak. Ndërsa për kompanitë jo rezidente, një vit më parë janë hapur vetëm 7 llogari të reja bankare.

Paratë në dorë kanë qenë gjithmonë mjeti i preferuar i shqiptarëve për kryerjen e blerjeve, por shtimi i numrit të llogarive bankare është përkthyer edhe me një rritje të numrit të pagesave me kartë ose përmes aplikacioneve online të bankave. Sipas statistikave, numri i pagesave eletronike u rrit me ritme shumë të shpejta gjatë vitit të shkuar, kontretisht në rreth 21 pagesa elektronike për frymë, duke tejkaluar pritshmëritë e Bankës së Shqipërisë.

Ndër objektivat e Bankës së Shqipërisë mbetet përfshirja më e gjerë financiare dhe reduktimi i parasë cash, me qëllim formalizimin e ekonomisë dhe gjenerimin e kursimeve vjetore në Prodhimin e Brendshëm Bruto. Si rrjedhojë, së fundmi ka nisur zbatimi i ligjit për llogaritë e pagesave me shërbime bazike.

Tarifat për hapjen e një llogarie bankare dhe tarifat e detyrueshme të mirëmbajtjes mujore ose vjetore do të jenë më të ulëta se ato për llogaritë standarde të pagesave, ndërsa për disa kategori vulnerabël sic janë pensionistët, është parashikuar që tarifa e shërbimeve të jetë zero. Kjo shihet si një instrument i rëndësishëm për të rritur përdorimin e shërbimeve bankare nga indvidët.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.