Të pasurit norvegjezë shpërngulen në Zvicër – Arsyeja, shmangia e taksave të larta mbi pasurinë
Rritja e fortë e taksave mbi pasurinë dhe dividentin nga qeveria e majtë e Norvegjisë ka bërë që dhjetëra të pasur të vendit nordik të zhvendosen. DNB banka ASA, huadhënësi më i madh i vendit, planifikon të hapë një zyrë përfaqësuese në Zyrih me dy punonjës që flasin gjuhën norvegjeze, me fokus në shërbimet bankare private. Banka e investimeve Arctic Securities AS po hap gjithashtu një degë në qytetin më të madh të Zvicrës, duke shpresuar të nxisë biznesin e saj të borxhit me rendiment të lartë. Sipas drejtuesve të këtyre institucioneve strategjia është ndjekja e klientëve.
Planet e bankierëve norvegjezë për të lëvizur në jug sinjalizojnë se një migrim i vogël, por domethënës i sipërmarrësve të pasur mund të bëhet i përhershëm, duke përforcuar statusin e Zvicrës si një parajsë me taksa të ulëta.
82 norvegjezë të pasur me një vlerë totale neto prej rreth 46 miliardë korona – 4.3 miliardë dollarë, u larguan nga vendi në 2022-2023 dhe 34 u larguan vetëm vitin e kaluar, sipas të dhënave nga Ministria e Financave. Më shumë se 70 prej tyre u shpërngulën në Zvicër.
Sipas një marrëveshjeje të taksimit të dyfishtë midis dy kombeve – ndër të paktat në Europë që kanë vendosur të mbajnë një taksë mbi pasurinë – ‘të mërguarit’ norvegjezë të kualifikuar mund t’u dorëzojnë një shumë të madhe autoriteteve zvicerane për të shmangur regjimin e vendit të tyre. Taksimi zviceran ndryshon nga kantoni në kanton, por efekti i përgjithshëm është një përqindje dukshëm më e ulët e të ardhurave se shumica e kombeve të tjera europiane.
Ndërkohë që në Norvegji janë vënë re reagimet e para politike, me të majtën që kritikojnë bankierët që këshillojnë klientët e tyre të largojnë pasurinë nga vendi.
Kabineti i kryeministrit Jonas Gar Store rriti barrën tatimore mbi pasurinë me 55%, të përshtatur për inflacionin. Të ardhurat e vlerësuara nga tatimi në pronë, përfshirë taksat mbi dividentët, arritën në 65 miliardë korona vitin e kaluar, nga 38 miliardë në 2021- shin.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.