Më pak ujë të ngrohtë dhe gaz – Gjermania nis kursimin dhe reduktimin e konsumit të energjisë

Pasojat ekonomike të luftës në Ukrainë po nisin të ndihen në shumë sektore. Në Gjermani, në Këln autoritetet vendore dhe qytetarët kanë vendosur të reduktojnë konsumin e energjisë pasi volumi i gazit natyror rus që vjen nëpërmjet gazsjellësit Nordstream 1 filloi të pakësohej.

Në disa pallate kaldajat janë ulur me disa gradë. Nuk mund të shpërdorohet asgjë! Është ky mesazhi i qartë ndërsa pakënaqësia e gjermanëve është në rritje sidomos për sa i përket qëndrimit dhe politikave të Berlinit. Janë të shumtë ata që mendojnë se qeveria është shumë e varur nga vende të ndryshme dhe ky është problemi kryesor. Vetë gjermanët varen nga qeveria e tyre dhe tani duhet të paguajnë për vendimet e politikanëve.

Dhe konsumi i energjisë është reduktuar. Pronarët e pishinave të hapura nuk do të ngrohin më ujin. Ditët e findit flukset e gazit rus drejt Gjermanisë janë reduktuar dhe autoritetet janë frikësuar se në muajt e ardhshëm do të ketë kufizime të mëtejshme.

Ndërsa në Hanover autoritetet kanë vendosur që në pishina, palestra dhe në hapësira të tjera publike do të jetë e mundur të bëhet dush vetëm me ujë të ftohtë, ndërsa shatërvanet do të mbyllen. Objektivi është kursimi i të paktën 15% të energjisë në mënyrë që të përballen më mirë me situatën aktuale në vend. Por nga ky vendim janë përjashtuar shkollat, spitalet, kopshtet dhe azilet e të moshuarve. Ndërkohë që dhe administrata të tjera gjermane po përgatisin plane për kursimin energjitik. Berlini ka vendosur të reduktojë në mënyrë drastike ndricimin gjatë natës të monumenteve të kryeqytetit.

Sipas ekspertëve Gjermania dhe vende të tjera europiane rrezikojnë seriozisht të përballen me një dimët të ashpër dhe të trazuar.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.