Ministri belg paralajmëron: BE-ja përballet me disa ‘dimra të tmerrshëm’ pa një kufi çmimi të gazit!

BE do të durojë disa dimra “të tmerrshëm” pa kontrolle mbi çmimet e gazit natyror, paralajmëroi të dielën ministri belg i energjisë. “5 deri në 10 dimrat e ardhshëm do të jenë të tmerrshëm nëse nuk bëhet asgjë”, shkroi Tinne Van der Straeten në Twitter. “Ne duhet të veprojmë në burim, në nivel europian dhe të punojmë për ngrirjen e çmimeve të gazit.”

Ministri i Energjisë i Belgjikës bëri thirrje për një kufi të çmimit të gazit në mbarë BE-në, duke shtuar se “koha për të biseduar ka mbaruar, tani është koha për të vendosur”. Mbështetja për kontrollet e çmimeve në nivel të BE-së është rritur në të gjithë bllokun, mes kostove në rritje të energjisë të shkaktuara nga lufta në Ukrainë.

“Ka një nevojë urgjente për të futur një kufi europian të çmimeve,” pohoi Van der Straeten. “Kjo mund të ulë faturën e energjisë me 770 euro në vit për familje.

Qeveritë në të gjithë Europën kanë ndërmarrë veprime për të lehtësuar kostot e energjisë në shtëpi, me shumë familje që luftojnë për të përballuar jetesën.  Masa të tjera që propozohen për të trajtuar krizën e kostos së jetesës janë taksimi i fitimeve të kompanive të energjisë, ofrimi i ndihmës financiare për familjet dhe subvencionimi i transportit publik.

Disa kompani të mëdha të naftës dhe gazit kanë arritur fitime rekord këtë vit për shkak të kostove të larta të energjisë. Van der Straeten tha se Belgjika po merrte drejtimin në thirrjen për një tavan çmimi në nivel evropian dhe kishte diskutuar propozimin me Komisionin Europian.

Familjet në Belgjikë aktualisht paguajnë nën mesataren evropiane për gazin dhe energjinë e tyre elektrike, me Bullgarinë, Holandën dhe Greqinë që paguajnë më shumë. Van der Straeten pretendoi se “Gjermania” ndan pozicionin belg për kontrollet e çmimeve në mbarë BE-në, megjithëse Berlini nuk e ka thënë publikisht këtë.

Në korrik, firmat gjermane kërkuan një kufi të çmimit të energjisë për të shmangur trazirat sociale. Gjermania, e cila është shumë e varur nga gazi rus, ka kërkuar të krijojë furnizime me gaz natyror përpara atij që parashikohet të jetë një dimër sfidues.

Ajo po ofron gjithashtu bileta të subvencionuara të transportit publik për të lehtësuar kostot e jetesës, duke ulur tatimin për gazin natyror nga 19% në 7%. Të dielën, vendi njoftoi se rezervat gjermane të gazit po mbusheshin më shpejt se sa pritej.

Në një deklaratë, Ministri i Ekonomisë dhe Klimës Robert Habeck tha se qeveria ishte në rrugën e duhur për të arritur objektivin e saj për të krijuar rezerva në 85% të kapacitetit deri në tetor.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.