Ministrja Krifca në Vlorë: Taskforca e AKU-së në 1500 inspektime, 3% raste të shkeljes së sigurisë ushqimore

Taskforca për sigurinë ushqimore vijon monitorimin në të gjithë subjektet që ofrojnë produkte ushqimore, për garantimin e sigurisë ushqimore dhe shëndetit të konsumatorëve vendas e të huaj.

Ministrja e Bujqësisë dhe Zhvillimit Rural, Frida Krifca ju bashkua ekipit të taskforcës të ngritur nga AKU ditën e sotme në Vlorë,  ku sëbashku me kryebashkiakun e Vlorës, Ermal Dredha,panë nga afër ecurinë e punës në garantimin e sigurisë ushqimore përgjatë sezonit veror që shënon edhe  konsum më të lartë.

Në fjalën e saj, Krifca siguroi se Autoriteti Kombëtar i Ushqimit ka vijuar planin e punës i fokusuar aty ku flukset e vizitorëve e turistëve janë më të shtuara.

“Në kushtet e një fluksi të shtuar turistësh dhe pushuesish, nevoja për respektimin e rregullave të sigurisë ushqimore bëhet shumë më e rëndësishme. Në javën e shtatë të aksionit që kemi ndërmarrë me taskforcën e AKU-së, me fokus kryesor të gjitha zonat turistike të Shqipërisë, jemi për të parë dhe monitoruar respektimin e sigurisë ushqimore në të gjithë zinxhirin e ofrimit të ushqimit, qofshin këto, subjekte fast foodeve, magazinave apo njësive tregatre”, tha Krifca.

Ministrja vuri në dukje se, inspektorët gjatë këtij procesi kanë parë dhe biseduar nga afër me subjektet tregtare të ushqimit, për këtë nismë të re të AKU-së, taskforcën, që ka një vëmendje të shtuar veçanërisht tani, gjatë sezonit veror, në kushtet e rritjes së konsumit me objektiv këshillimin për respektimin e ligjit për ushqimin. Ndër të tjera Krifca shtoi se do të ketë zero tolerancë për ata që shkelin ligjin e sigurisë ushqimore duke i referuar këto raste në prokurori,ashtu sikundëe është vepruar deri më tani.

Krifca bëri të ditur se, në qarkun e Vlorës,kanë konstatuar problematikë në një subjekt fast foodi,  në zonën e Dhërmiut, ku është evidentuar shkelje me fshirjen e etiketave dhe afateve të skadencës.

“Kjo është shkelje e rëndë e ligjit për ushqimin dhe ne nuk  tolerojmë askënd që cënon sigurinë ushqimore të konsumatorëve.  Në totalin e 1500 inspektimeve, që ne kemi kryer në territor gjatë sezonit turistik, vetëm 3 % e rasteve kanë rezultuar me shkelje të rregullave dhe standardeve të kërkuara të sigurisë ushqimore”, tha ministrja.

Krifca vuri në dukje se  përmes këshillimit që po zhvillohet në të gjithë vendin me subjektet ushqimore, synohet të reduktohen më tej problematikat që cënojnë sigurinë ushqimore.

Kryetari i bashkisë Vlorë Dredha, tha se, fokus i taskfocës ka qënë jo vetëm kontrolli i subjekteve për respektimin e ligjit për ushqimin, por edhe i vlerësimit të cilësisë së ofrimit të shërbimeve, si vlerë e shtuar në standardet e sigurisë ushqimore.

Ai tha se, konstatimi i shklejve në subjektet tregtare për sigurinë ushqimore është në nivele shumë të ulëta dhe ky është një lajm i mirë për rritjen e sigurisë ushqimore në të gjithë zinxhirin ushqimor për qarkun e Vlorës, veçanërisht në sezonin e verës ku fluksi i konsumatorëve shumëfishohet .

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.