Ministrja Kumbaro në Insider: Gjirokastra dhe zonat e tjera do të kenë një kategori të re hotelesh. Rezervimet?! Në verë s’ka më dhoma

Gjirokastra po njeh sëfundmi një fluks të shtuar turistësh, çka ka bërë që strukturat akomoduese të qytetit të jetë të rezervuara nga turistët për javë e muaj të tërë.

Vetëm gjatë vitit të kaluar, ky qytet ka akomoduar rreth 300 mijë turistë, shifër kjo që këtë vit duket të jetë me e lartë, nëse analizojmë tendencën e muajve të fundit.

E ftuar në emisionin Insider kushtuar turizmit në Gjirokastër, ministrja e Turizmit Mirela Kumbaro evidentoi se një pjesë e madhe e hoteleve dhe strukturave akomoduese të qytetit janë të rezervuara pothuajse për të gjithë sezonin veror.

“Në verë nuk ka më dhoma, ejani në vjeshtë! Madje edhe në vjeshtë janë të zëna, rezervoni për vitin tjetër!” tha ministrja për të treguar fluksin e lartë të turistëve që po njeh Gjirokastra.

Vitin e shkuar Shqipërinë e vizituan më shumë se 10 milionë turistë, një pjesë e mirë prej tyre zgjodhën Gjirokastrën.

Sipas statistikave të deritanishme, viti 2024 është vit edhe më premtues sa i përket sezonit turistik.

Në vijim të bashkëbisedimit, Ministrja e Turizmit u ndal edhe në risitë që sjell ligji i ri për turizmin, që sjell një kategori të re hoteli.

“Në ndryshimin e fundit që ne kemi në ligjin për turizmin, ne kemi shtuar një kategori të re hoteli. I ftoj të gjithë ata që kanë hotele në zonat muzeale, në qendrat historike, jo vetëm në Gjirokastër, të vijnë të aplikojnë në Ministrinë e Turizmit për të marrë këtë kategori të re, që quhet “Hotel Trashëgimi Kulturore” tha ministrja për SCAN .

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.