Miratohen dy centrale diellore – Fuqia totale e instaluar 70.56 MW, do të ndërtohen në zonën e Fierit

Dy centrale fotovoltaike kanë marrë miratimin nga Këshilli i Ministrave për ndërtimin e tyre. Projektet nuk janë objekt koncesioni, çka do të thotë se nuk përfitojnë nga masat mbështetëse që parashikohen nga legjislacioni në fuqi, për nxitjen e burimeve të rinovueshme të energjisë, që përfshijnë lehtësim në sigurimin e dokumentacionit apo blerje të garantuar të energjisë së prodhuar.

Projekti për centralin e parë parashikon një kapacitet të instaluar prej 40.56 MW, me vendodhje në Sheq Marinas të Fierit. Ndërkohë që, centrali I dytë parashikon një fuqi të instaliar prej 30 MW dhe do të jetë I pozicionuar në fshatin Povelçë, në Fier.

Në fakt, viti 2024 ka nisur me një interes të lartë nga investitorët për centrale të mëdhenj fotovoltaikë. Sipas të dhënave nga Ministria e Infrastrukturës dhe Energjisë deri më tani janë dorëzuar pranë këtij dikasteri 11 aplikime.

Referuar interesit të shprehur pranë këtij dikasteri, fuqia totale e instaluar e projekteve të paraqitur është mbi 404 MW. Në rast të finalizimit të procedurave, këto projekte nuk do të jenë përfituese të masave mbështetëse të qeverisë.

Interesi për investime në energji diellore ka disa vite që ka ardhur në rritje nga ana e investitorëve privatë, ndërkohë që një pjesë e kërkesave janë pranuar, ndërsa të tjera jo.

Aktualisht, energjia diellore nga impiantet e mëdhenj është pak e shfrytëzuar në vendin tonë, teksa kapaciteti total i instaluar është vetëm 40 MW.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.