Miratohet rritja e “tavanit” të borxhit në SHBA – Republikanët i konsideruan të përmbushura kushtet e tyre
Kryetari republikan i Dhomës së Përfaqësuesve të SHBA Kevin McCarthy e cilësoi si një nga mbrëmjet më të mira, që kur u bë anëtar i Kongresit, atë të 31 majit, pas miratimit të projektligjit për tavanin e borxhit.
Gjashtë muaj pasi përjetoi 15 procese votimi për t’u zgjedhur kryetar, McCarthy u tregua i aftë të tërhiqte Biden në negociata mbi shpenzimet dhe prioritetet e tjera republikane, dhe më pas të grumbullonte dy të tretat e shumicës republikane të Dhomës së Përfaqësuesve për të miratuar legjislacionin dypartiak.
Dhoma miratoi me 314 vota pro dhe 117 kundër projektligjin, i cili heq tavanin e borxhit prej 31.4 trilion dollarësh të qeverisë në këmbim të shkurtimit të shpenzimeve diskrecionale jo-mbrojtëse dhe forcimit të kërkesave për punë në programet e ndihmës.
Megjithatë ishte një fitore e vështirë për McCarthy. Projektligji fitoi 165 vota nga demokratët, duke tejkaluar 149 nga anëtarët e partisë republikane të McCarthy.
Projektligji tani shkon në Senatin e kontrolluar ngushtë nga demokratët, i cili duhet ta miratojë atë dhe ta dërgojë atë në tryezën e Bidenit deri më 5 qershor për të shmangur një falimentim të SHBA-së.
McCarthy ka arritur deri më tani në miratimin e projektligjit pa tërhequr pas vetes sulme të drejtpërdrejta verbale nga ish-presidenti Donald Trump, i cili u kërkoi republikanëve të lejonin falimentimin nëse nuk do të ishin në gjendje të përfitonin lëshime të mjaftueshme nga demokratët.
Projektligji i miratuar nga Dhoma e Përfaqësuesve pezullon kufirin e borxhit – në thelb që do të thotë se ai nuk zbatohet më – deri më 1 janar 2025. Kjo vendos bazën për një tjetër përballje në javët pas zgjedhjeve presidenciale të 2024 – ës.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.